Sher on Zindagi

jo guzārī na jā sakī ham se

ham ne vo zindagī guzārī hai

jo guzari na ja saki hum se

hum ne wo zindagi guzari hai

hosh vāloñ ko ḳhabar kyā be-ḳhudī kyā chiiz hai

ishq kiije phir samajhiye zindagī kyā chiiz hai

hosh walon ko KHabar kya be-KHudi kya chiz hai

ishq kije phir samajhiye zindagi kya chiz hai

zindagī kis tarah basar hogī

dil nahīñ lag rahā mohabbat meñ

zindagi kis tarah basar hogi

dil nahin lag raha mohabbat mein

zindagī tū ne mujhe qabr se kam dī hai zamīñ

paañv phailā.ūñ to dīvār meñ sar lagtā hai

zindagi tu ne mujhe qabr se kam di hai zamin

panw phailaun to diwar mein sar lagta hai

zindagī zinda-dilī kā hai naam

murda-dil ḳhaak jiyā karte haiñ

zindagi zinda-dili ka hai nam

murda-dil KHak jiya karte hain

sair kar duniyā kī ġhāfil zindagānī phir kahāñ

zindagī gar kuchh rahī to ye javānī phir kahāñ

sair kar duniya ki ghafil zindagani phir kahan

zindagi gar kuchh rahi to ye jawani phir kahan

maut kā bhī ilaaj ho shāyad

zindagī kā koī ilaaj nahīñ

maut ka bhi ilaj ho shayad

zindagi ka koi ilaj nahin

umr-e-darāz maañg ke laa.ī thī chaar din

do aarzū meñ kaT ga.e do intizār meñ

umr-e-daraaz mang ke lai thi chaar din

do aarzu mein kaT gae do intizar mein

dekhā hai zindagī ko kuchh itne qarīb se

chehre tamām lagne lage haiñ ajiib se

dekha hai zindagi ko kuchh itne qarib se

chehre tamam lagne lage hain ajib se

tum mohabbat ko khel kahte ho

ham ne barbād zindagī kar lī

tum mohabbat ko khel kahte ho

hum ne barbaad zindagi kar li

dhuup meñ niklo ghaTāoñ meñ nahā kar dekho

zindagī kyā hai kitāboñ ko haTā kar dekho

dhup mein niklo ghaTaon mein naha kar dekho

zindagi kya hai kitabon ko haTa kar dekho

le de ke apne paas faqat ik nazar to hai

kyuuñ dekheñ zindagī ko kisī kī nazar se ham

le de ke apne pas faqat ek nazar to hai

kyun dekhen zindagi ko kisi ki nazar se hum

zindagī shāyad isī kā naam hai

dūriyāñ majbūriyāñ tanhā.iyāñ

zindagi shayad isi ka nam hai

duriyan majburiyan tanhaiyan

ġharaz ki kaaT diye zindagī ke din ai dost

vo terī yaad meñ hoñ yā tujhe bhulāne meñ

gharaz ki kaT diye zindagi ke din ai dost

wo teri yaad mein hon ya tujhe bhulane mein

ab to ḳhushī kā ġham hai na ġham kī ḳhushī mujhe

be-his banā chukī hai bahut zindagī mujhe

ab to KHushi ka gham hai na gham ki KHushi mujhe

be-his bana chuki hai bahut zindagi mujhe

zindagī ek fan hai lamhoñ ko

apne andāz se gañvāne kā

zindagi ek fan hai lamhon ko

apne andaz se ganwane ka

zindagī kyā kisī muflis kī qabā hai jis meñ

har ghaḌī dard ke paivand lage jaate haiñ

zindagi kya kisi muflis ki qaba hai jis mein

har ghaDi dard ke paiwand lage jate hain

ab mirī koī zindagī hī nahīñ

ab bhī tum merī zindagī ho kyā

ab meri koi zindagi hi nahin

ab bhi tum meri zindagi ho kya

kuchh is tarah se guzārī hai zindagī jaise

tamām umr kisī dūsre ke ghar meñ rahā

kuchh is tarah se guzari hai zindagi jaise

tamam umr kisi dusre ke ghar mein raha

yuuñ to marne ke liye zahr sabhī piite haiñ

zindagī tere liye zahr piyā hai maiñ ne

yun to marne ke liye zahr sabhi pite hain

zindagi tere liye zahr piya hai main ne

maiñ zindagī kā saath nibhātā chalā gayā

har fikr ko dhueñ meñ uḌātā chalā gayā

main zindagi ka sath nibhata chala gaya

har fikr ko dhuen mein uData chala gaya

zindagī kyā hai anāsir meñ zuhūr-e-tartīb

maut kyā hai inhīñ ajzā kā pareshāñ honā

zindagi kya hai anasir mein zuhur-e-tartib

maut kya hai inhin ajza ka pareshan hona

kis tarah jamā kījiye ab apne aap ko

kāġhaz bikhar rahe haiñ purānī kitāb ke

kis tarah jama kijiye ab apne aap ko

kaghaz bikhar rahe hain purani kitab ke

is tarah zindagī ne diyā hai hamārā saath

jaise koī nibāh rahā ho raqīb se

is tarah zindagi ne diya hai hamara sath

jaise koi nibah raha ho raqib se

dard aisā hai ki jī chāhe hai zinda rahiye

zindagī aisī ki mar jaane ko jī chāhe hai

dard aisa hai ki ji chahe hai zinda rahiye

zindagi aisi ki mar jaane ko ji chahe hai

gañvā.ī kis kī tamannā meñ zindagī maiñ ne

vo kaun hai jise dekhā nahīñ kabhī maiñ ne

ganwai kis ki tamanna mein zindagi main ne

wo kaun hai jise dekha nahin kabhi main ne

koī ḳhāmosh zaḳhm lagtī hai

zindagī ek nazm lagtī hai

koi KHamosh zaKHm lagti hai

zindagi ek nazm lagti hai

kam se kam maut se aisī mujhe ummīd nahīñ

zindagī tū ne to dhoke pe diyā hai dhoka

kam se kam maut se aisi mujhe ummid nahin

zindagi tu ne to dhoke pe diya hai dhoka

yahī hai zindagī kuchh ḳhvāb chand ummīdeñ

inhīñ khilaunoñ se tum bhī bahal sako to chalo

yahi hai zindagi kuchh KHwab chand ummiden

inhin khilaunon se tum bhi bahal sako to chalo

har nafas umr-e-guzishta kī hai mayyat 'fānī'

zindagī naam hai mar mar ke jiye jaane kā

har nafas umr-e-guzishta ki hai mayyat 'fani'

zindagi nam hai mar mar ke jiye jaane ka

tū kahānī hī ke parde meñ bhalī lagtī hai

zindagī terī haqīqat nahīñ dekhī jaatī

tu kahani hi ke parde mein bhali lagti hai

zindagi teri haqiqat nahin dekhi jati

zindagī kyā hai ik kahānī hai

ye kahānī nahīñ sunānī hai

zindagi kya hai ek kahani hai

ye kahani nahin sunani hai

mujhe zindagī kī duā dene vaale

hañsī aa rahī hai tirī sādgī par

mujhe zindagi ki dua dene wale

hansi aa rahi hai teri sadgi par

ye maanā zindagī hai chaar din kī

bahut hote haiñ yaaro chaar din bhī

ye mana zindagi hai chaar din ki

bahut hote hain yaro chaar din bhi

ham ġham-zada haiñ laa.eñ kahāñ se ḳhushī ke giit

deñge vahī jo pā.eñge is zindagī se ham

hum gham-zada hain laen kahan se KHushi ke git

denge wahi jo paenge is zindagi se hum

gar zindagī meñ mil ga.e phir ittifāq se

pūchheñge apnā haal tirī bebasī se ham

gar zindagi mein mil gae phir ittifaq se

puchhenge apna haal teri bebasi se hum

'mīr' amdan bhī koī martā hai

jaan hai to jahān hai pyāre

'mir' amdan bhi koi marta hai

jaan hai to jahan hai pyare

jo log maut ko zālim qarār dete haiñ

ḳhudā milā.e unheñ zindagī ke māroñ se

jo log maut ko zalim qarar dete hain

KHuda milae unhen zindagi ke maron se

musībat aur lambī zindagānī

buzurgoñ kī duā ne maar Daalā

musibat aur lambi zindagani

buzurgon ki dua ne mar Dala

yuuñ zindagī guzār rahā huuñ tire baġhair

jaise koī gunāh kiye jā rahā huuñ maiñ

yun zindagi guzar raha hun tere baghair

jaise koi gunah kiye ja raha hun main

zindagī hai yā koī tūfān hai!

ham to is jiine ke hāthoñ mar chale

zindagi hai ya koi tufan hai!

hum to is jine ke hathon mar chale

ik muamma hai samajhne kā na samjhāne kā

zindagī kaahe ko hai ḳhvāb hai dīvāne kā

ek muamma hai samajhne ka na samjhane ka

zindagi kahe ko hai KHwab hai diwane ka

maañ kī āġhosh meñ kal maut kī āġhosh meñ aaj

ham ko duniyā meñ ye do vaqt suhāne se mile

man ki aaghosh mein kal maut ki aaghosh mein aaj

hum ko duniya mein ye do waqt suhane se mile

zindagī kyā hai aaj ise ai dost

soch leñ aur udaas ho jaa.eñ

zindagi kya hai aaj ise ai dost

soch len aur udas ho jaen

qaid-e-hayāt o band-e-ġham asl meñ donoñ ek haiñ

maut se pahle aadmī ġham se najāt paa.e kyuuñ

qaid-e-hayat o band-e-gham asl mein donon ek hain

maut se pahle aadmi gham se najat pae kyun

hai ajiib shahr kī zindagī na safar rahā na qayām hai

kahīñ kārobār sī dopahar kahīñ bad-mizāj sī shaam hai

hai ajib shahr ki zindagi na safar raha na qayam hai

kahin karobar si dopahar kahin bad-mizaj si sham hai

bahāne aur bhī hote jo zindagī ke liye

ham ek baar tirī aarzū bhī kho dete

bahane aur bhi hote jo zindagi ke liye

hum ek bar teri aarzu bhi kho dete

mirī zindagī to guzrī tire hijr ke sahāre

mirī maut ko bhī pyāre koī chāhiye bahāna

meri zindagi to guzri tere hijr ke sahaare

meri maut ko bhi pyare koi chahiye bahana

ishq ko ek umr chāhiye aur

umr kā koī e'tibār nahīñ

ishq ko ek umr chahiye aur

umr ka koi e'tibar nahin

māñgī thī ek baar duā ham ne maut kī

sharminda aaj tak haiñ miyāñ zindagī se ham

mangi thi ek bar dua hum ne maut ki

sharminda aaj tak hain miyan zindagi se hum