ham ko miTā sake ye zamāne meñ dam nahīñ

ham se zamāna ḳhud hai zamāne se ham nahīñ

hum ko miTa sake ye zamane mein dam nahin

hum se zamana KHud hai zamane se hum nahin

ye ishq nahīñ āsāñ itnā hī samajh liije

ik aag kā dariyā hai aur Duub ke jaanā hai

ye ishq nahin aasan itna hi samajh lije

ek aag ka dariya hai aur Dub ke jaana hai

dil meñ kisī ke raah kiye jā rahā huuñ maiñ

kitnā hasīñ gunāh kiye jā rahā huuñ maiñ

dil mein kisi ke rah kiye ja raha hun main

kitna hasin gunah kiye ja raha hun main

ham ne siine se lagāyā dil na apnā ban sakā

muskurā kar tum ne dekhā dil tumhārā ho gayā

hum ne sine se lagaya dil na apna ban saka

muskura kar tum ne dekha dil tumhaara ho gaya

ik lafz-e-mohabbat kā adnā ye fasānā hai

simTe to dil-e-āshiq phaile to zamāna hai

ek lafz-e-mohabbat ka adna ye fasana hai

simTe to dil-e-ashiq phaile to zamana hai

jo tūfānoñ meñ palte jā rahe haiñ

vahī duniyā badalte jā rahe haiñ

jo tufanon mein palte ja rahe hain

wahi duniya badalte ja rahe hain

terī āñkhoñ kā kuchh qusūr nahīñ

haañ mujhī ko ḳharāb honā thā

teri aankhon ka kuchh qusur nahin

han mujhi ko KHarab hona tha

tire jamāl kī tasvīr khīñch duuñ lekin

zabāñ meñ aañkh nahīñ aañkh meñ zabān nahīñ

tere jamal ki taswir khinch dun lekin

zaban mein aankh nahin aankh mein zaban nahin

un kā jo farz hai vo ahl-e-siyāsat jāneñ

merā paiġhām mohabbat hai jahāñ tak pahuñche

un ka jo farz hai wo ahl-e-siyasat jaanen

mera paigham mohabbat hai jahan tak pahunche

itne hijāboñ par to ye aalam hai husn kā

kyā haal ho jo dekh leñ parda uThā ke ham

itne hijabon par to ye aalam hai husn ka

kya haal ho jo dekh len parda uTha ke hum

apnā zamāna aap banāte haiñ ahl-e-dil

ham vo nahīñ ki jin ko zamāna banā gayā

apna zamana aap banate hain ahl-e-dil

hum wo nahin ki jin ko zamana bana gaya

aa ki tujh bin is tarah ai dost ghabrātā huuñ maiñ

jaise har shai meñ kisī shai kī kamī paatā huuñ maiñ

aa ki tujh bin is tarah ai dost ghabraata hun main

jaise har shai mein kisi shai ki kami pata hun main

ishq jab tak na kar chuke rusvā

aadmī kaam kā nahīñ hotā

ishq jab tak na kar chuke ruswa

aadmi kaam ka nahin hota

āġhāz-e-mohabbat kā anjām bas itnā hai

jab dil meñ tamannā thī ab dil hī tamannā hai

aaghaz-e-mohabbat ka anjam bas itna hai

jab dil mein tamanna thi ab dil hi tamanna hai

yuuñ zindagī guzār rahā huuñ tire baġhair

jaise koī gunāh kiye jā rahā huuñ maiñ

yun zindagi guzar raha hun tere baghair

jaise koi gunah kiye ja raha hun main

yā vo the ḳhafā ham se yā ham haiñ ḳhafā un se

kal un kā zamāna thā aaj apnā zamānā hai

ya wo the KHafa hum se ya hum hain KHafa un se

kal un ka zamana tha aaj apna zamana hai

kyā husn ne samjhā hai kyā ishq ne jaanā hai

ham ḳhāk-nashīnoñ kī Thokar meñ zamānā hai

kya husn ne samjha hai kya ishq ne jaana hai

hum KHak-nashinon ki Thokar mein zamana hai

aadmī aadmī se miltā hai

dil magar kam kisī se miltā hai

aadmi aadmi se milta hai

dil magar kam kisi se milta hai

hasīñ terī āñhkeñ hasīñ tere aañsū

yahīñ Duub jaane ko jī chāhtā hai

hasin teri aanhken hasin tere aansu

yahin Dub jaane ko ji chahta hai

mirī zindagī to guzrī tire hijr ke sahāre

mirī maut ko bhī pyāre koī chāhiye bahāna

meri zindagi to guzri tere hijr ke sahaare

meri maut ko bhi pyare koi chahiye bahana

duniyā ke sitam yaad na apnī hī vafā yaad

ab mujh ko nahīñ kuchh bhī mohabbat ke sivā yaad

duniya ke sitam yaad na apni hi wafa yaad

ab mujh ko nahin kuchh bhi mohabbat ke siwa yaad

pahle sharāb ziist thī ab ziist hai sharāb

koī pilā rahā hai piye jā rahā huuñ maiñ

pahle sharab zist thi ab zist hai sharab

koi pila raha hai piye ja raha hun main

aadat ke ba.ad dard bhī dene lagā mazā

hañs hañs ke aah aah kiye jā rahā huuñ maiñ

aadat ke baad dard bhi dene laga maza

hans hans ke aah aah kiye ja raha hun main

donoñ hāthoñ se lūTtī hai hameñ

kitnī zālim hai terī añgḌā.ī

donon hathon se luTti hai hamein

kitni zalim hai teri angDai

ātish-e-ishq vo jahannam hai

jis meñ firdaus ke nazāre haiñ

aatish-e-ishq wo jahannam hai

jis mein firdaus ke nazare hain

kuchh khaTaktā to hai pahlū meñ mire rah rah kar

ab ḳhudā jaane tirī yaad hai yā dil merā

kuchh khaTakta to hai pahlu mein mere rah rah kar

ab KHuda jaane teri yaad hai ya dil mera

merī nigāh-e-shauq bhī kuchh kam nahīñ magar

phir bhī tirā shabāb tirā hī shabāb hai

meri nigah-e-shauq bhi kuchh kam nahin magar

phir bhi tera shabab tera hi shabab hai

us ne apnā banā ke chhoḌ diyā

kyā asīrī hai kyā rihā.ī hai

us ne apna bana ke chhoD diya

kya asiri hai kya rihai hai

ābād agar na dil ho to barbād kījiye

gulshan na ban sake to bayābāñ banā.iye

aabaad agar na dil ho to barbaad kijiye

gulshan na ban sake to bayaban banaiye

ibtidā vo thī ki jiinā thā mohabbat meñ muhāl

intihā ye hai ki ab marnā bhī mushkil ho gayā

ibtida wo thi ki jina tha mohabbat mein muhaal

intiha ye hai ki ab marna bhi mushkil ho gaya

ek aisā bhī vaqt hotā hai

muskurāhaT bhī aah hotī hai

ek aisa bhi waqt hota hai

muskurahaT bhi aah hoti hai

allāh agar taufīq na de insān ke bas kā kaam nahīñ

faizān-e-mohabbat aam sahī irfān-e-mohabbat aam nahīñ

allah agar taufiq na de insan ke bas ka kaam nahin

faizan-e-mohabbat aam sahi irfan-e-mohabbat aam nahin

sunā hai hashr meñ har aañkh use be-parda dekhegī

mujhe Dar hai na tauhīn-e-jamāl-e-yār ho jaa.e

suna hai hashr mein har aankh use be-parda dekhegi

mujhe Dar hai na tauhin-e-jamal-e-yar ho jae

bahut hasīn sahī sohbateñ guloñ kī magar

vo zindagī hai jo kāñToñ ke darmiyāñ guzre

bahut hasin sahi sohbaten gulon ki magar

wo zindagi hai jo kanTon ke darmiyan guzre

haa.e re majbūriyāñ mahrūmiyāñ nākāmiyāñ

ishq āḳhir ishq hai tum kyā karo ham kyā kareñ

hae re majburiyan mahrumiyan nakaamiyan

ishq aaKHir ishq hai tum kya karo hum kya karen

dil hai qadmoñ par kisī ke sar jhukā ho yā na ho

bandagī to apnī fitrat hai ḳhudā ho yā na ho

dil hai qadmon par kisi ke sar jhuka ho ya na ho

bandagi to apni fitrat hai KHuda ho ya na ho

na ġharaz kisī se na vāsta mujhe kaam apne hī kaam se

tire zikr se tirī fikr se tirī yaad se tire naam se

na gharaz kisi se na wasta mujhe kaam apne hi kaam se

tere zikr se teri fikr se teri yaad se tere nam se

zindagī ik hādsa hai aur kaisā hādsa

maut se bhī ḳhatm jis kā silsila hotā nahīñ

zindagi ek hadsa hai aur kaisa hadsa

maut se bhi KHatm jis ka silsila hota nahin

kidhar se barq chamaktī hai dekheñ ai vaa.iz

maiñ apnā jaam uThātā huuñ tū kitāb uThā

kidhar se barq chamakti hai dekhen ai waiz

main apna jam uThata hun tu kitab uTha

ab to ye bhī nahīñ rahā ehsās

dard hotā hai yā nahīñ hotā

ab to ye bhi nahin raha ehsas

dard hota hai ya nahin hota

husn ko bhī kahāñ nasīb 'jigar'

vo jo ik shai mirī nigāh meñ hai

husn ko bhi kahan nasib 'jigar'

wo jo ek shai meri nigah mein hai

kabhī un mad-bharī āñkhoñ se piyā thā ik jaam

aaj tak hosh nahīñ hosh nahīñ hosh nahīñ

kabhi un mad-bhari aankhon se piya tha ek jam

aaj tak hosh nahin hosh nahin hosh nahin

bhulānā hamārā mubārak mubārak

magar shart ye hai na yaad ā.iyegā

bhulana hamara mubarak mubarak

magar shart ye hai na yaad aaiyega

maut kyā ek lafz-e-be-ma.anī

jis ko maarā hayāt ne maarā

maut kya ek lafz-e-be-mani

jis ko mara hayat ne mara

hamīñ jab na hoñge to kyā rañg-e-mahfil

kise dekh kar aap sharmā.iyegā

hamin jab na honge to kya rang-e-mahfil

kise dekh kar aap sharmaiyega

usī ko kahte haiñ jannat usī ko dozaḳh bhī

vo zindagī jo hasīnoñ ke darmiyāñ guzre

usi ko kahte hain jannat usi ko dozaKH bhi

wo zindagi jo hasinon ke darmiyan guzre

vo chiiz kahte haiñ firdaus-e-gum-shuda jis ko

kabhī kabhī tirī āñkhoñ meñ paa.ī jaatī hai

wo chiz kahte hain firdaus-e-gum-shuda jis ko

kabhi kabhi teri aankhon mein pai jati hai

mohabbat meñ ye kyā maqām aa rahe haiñ

ki manzil pe haiñ aur chale jā rahe haiñ

mohabbat mein ye kya maqam aa rahe hain

ki manzil pe hain aur chale ja rahe hain

dard o ġham dil kī tabī.at ban ga.e

ab yahāñ ārām hī ārām hai

dard o gham dil ki tabiat ban gae

ab yahan aaram hi aaram hai

ham ishq ke māroñ kā itnā hī fasānā hai

rone ko nahīñ koī hañsne ko zamānā hai

hum ishq ke maron ka itna hi fasana hai

rone ko nahin koi hansne ko zamana hai