sirf ik qadam uThā thā ġhalat rāh-e-shauq meñ

manzil tamām umr mujhe DhūñDhtī rahī

sirf ek qadam uTha tha ghalat rah-e-shauq mein

manzil tamam umr mujhe DhunDhti rahi

dil abhī puurī tarah TuuTā nahīñ

dostoñ kī mehrbānī chāhiye

dil abhi puri tarah TuTa nahin

doston ki mehrbani chahiye

dil ḳhush huā hai masjid-e-vīrāñ ko dekh kar

merī tarah ḳhudā kā bhī ḳhāna ḳharāb hai

dil KHush hua hai masjid-e-viran ko dekh kar

meri tarah KHuda ka bhi KHana KHarab hai

bārish sharāb-e-arsh hai ye soch kar 'adam'

bārish ke sab hurūf ko ulTā ke pī gayā

barish sharab-e-arsh hai ye soch kar 'adam'

barish ke sab huruf ko ulTa ke pi gaya

kahte haiñ umr-e-rafta kabhī lauTtī nahīñ

jā mai-kade se merī javānī uThā ke lā

kahte hain umr-e-rafta kabhi lauTti nahin

ja mai-kade se meri jawani uTha ke la

jin se insāñ ko pahuñchtī hai hamesha taklīf

un kā da.avā hai ki vo asl ḳhudā vaale haiñ

jin se insan ko pahunchti hai hamesha taklif

un ka dawa hai ki wo asl KHuda wale hain

ai ġham-e-zindagī na ho nārāz

mujh ko aadat hai muskurāne kī

ai gham-e-zindagi na ho naraaz

mujh ko aadat hai muskurane ki

shāyad mujhe nikāl ke pachhtā rahe hoñ aap

mahfil meñ is ḳhayāl se phir aa gayā huuñ maiñ

shayad mujhe nikal ke pachhta rahe hon aap

mahfil mein is KHayal se phir aa gaya hun main

saaqī mujhe sharāb kī tohmat nahīñ pasand

mujh ko tirī nigāh kā ilzām chāhiye

saqi mujhe sharab ki tohmat nahin pasand

mujh ko teri nigah ka ilzam chahiye

maiñ mai-kade kī raah se ho kar nikal gayā

varna safar hayāt kā kaafī tavīl thā

main mai-kade ki rah se ho kar nikal gaya

warna safar hayat ka kafi tawil tha

baḌh ke tūfān ko āġhosh meñ le le apnī

Dūbne vaale tire haath se sāhil to gayā

baDh ke tufan ko aaghosh mein le le apni

Dubne wale tere hath se sahil to gaya

ik hasīñ aañkh ke ishāre par

qāfile raah bhuul jaate haiñ

ek hasin aankh ke ishaare par

qafile rah bhul jate hain

muskurāhaT hai husn kā zevar

muskurānā na bhuul jaayā karo

muskurahaT hai husn ka zewar

muskurana na bhul jaya karo

taklīf miT ga.ī magar ehsās rah gayā

ḳhush huuñ ki kuchh na kuchh to mire paas rah gayā

taklif miT gai magar ehsas rah gaya

KHush hun ki kuchh na kuchh to mere pas rah gaya

husn ik dilrubā hukūmat hai

ishq ik qudratī ġhulāmī hai

husn ek dilruba hukumat hai

ishq ek qudrati ghulami hai

ijāzat ho to maiñ tasdīq kar luuñ terī zulfoñ se

sunā hai zindagī ik ḳhūb-sūrat daam hai saaqī

ijazat ho to main tasdiq kar lun teri zulfon se

suna hai zindagi ek KHub-surat dam hai saqi

thoḌī sī aql laa.e the ham bhī magar 'adam'

duniyā ke hādsāt ne dīvāna kar diyā

thoDi si aql lae the hum bhi magar 'adam'

duniya ke hadsat ne diwana kar diya

shikan na Daal jabīñ par sharāb dete hue

ye muskurātī huī chiiz muskurā ke pilā

shikan na Dal jabin par sharab dete hue

ye muskuraati hui chiz muskura ke pila

maiñ umr bhar javāb nahīñ de sakā 'adam'

vo ik nazar meñ itne savālāt kar ga.e

main umr bhar jawab nahin de saka 'adam'

wo ek nazar mein itne sawalat kar gae

vo mile bhī to ik jhijhak sī rahī

kaash thoḌī sī ham piye hote

wo mile bhi to ek jhijhak si rahi

kash thoDi si hum piye hote

zarā ik tabassum kī taklīf karnā

ki gulzār meñ phuul murjhā rahe haiñ

zara ek tabassum ki taklif karna

ki gulzar mein phul murjha rahe hain

ye alag baat hai saaqī ki mujhe hosh nahīñ

hosh itnā hai ki maiñ tujh se farāmosh nahīñ

ye alag baat hai saqi ki mujhe hosh nahin

hosh itna hai ki main tujh se faramosh nahin

jab tire nain muskurāte haiñ

ziist ke rañj bhuul jaate haiñ

jab tere nain muskuraate hain

zist ke ranj bhul jate hain

kaun añgḌā.ī le rahā hai 'adam'

do jahāñ laḌkhaḌā.e jaate haiñ

kaun angDai le raha hai 'adam'

do jahan laDkhaDae jate hain

maiñ bad-nasīb huuñ mujh ko na de ḳhushī itnī

ki maiñ ḳhushī ko bhī le kar ḳharāb kar dūñgā

main bad-nasib hun mujh ko na de KHushi itni

ki main KHushi ko bhi le kar KHarab kar dunga

jin ko daulat haqīr lagtī hai

uf vo kitne amiir hote haiñ

jin ko daulat haqir lagti hai

uf wo kitne amir hote hain

chhoḌā nahīñ ḳhudī ko dauḌe ḳhudā ke pīchhe

āsāñ ko chhoḌ bande mushkil ko DhūñDte haiñ

chhoDa nahin KHudi ko dauDe KHuda ke pichhe

aasan ko chhoD bande mushkil ko DhunDte hain

ham ne tumhāre baad na rakkhī kisī se aas

ik tajraba bahut thā baḌe kaam aa gayā

hum ne tumhaare baad na rakkhi kisi se aas

ek tajraba bahut tha baDe kaam aa gaya

savāl kar ke maiñ ḳhud hī bahut pashemāñ huuñ

javāb de ke mujhe aur sharmsār na kar

sawal kar ke main KHud hi bahut pasheman hun

jawab de ke mujhe aur sharmsar na kar

log kahte haiñ ki tum se hī mohabbat hai mujhe

tum jo kahte ho ki vahshat hai to vahshat hogī

log kahte hain ki tum se hi mohabbat hai mujhe

tum jo kahte ho ki wahshat hai to wahshat hogi

ham ko shāhoñ kī adālat se tavaqqo to nahīñ

aap kahte haiñ to zanjīr hilā dete haiñ

hum ko shahon ki adalat se tawaqqo to nahin

aap kahte hain to zanjir hila dete hain

saaqī zarā nigāh milā kar to dekhnā

kambaḳht hosh meñ to nahīñ aa gayā huuñ maiñ

saqi zara nigah mila kar to dekhna

kambaKHt hosh mein to nahin aa gaya hun main

marne vaale to ḳhair haiñ bebas

jiine vaale kamāl karte haiñ

marne wale to KHair hain bebas

jine wale kamal karte hain

mai-kada hai yahāñ sukūñ se baiTh

koī aafat idhar nahīñ aatī

mai-kada hai yahan sukun se baiTh

koi aafat idhar nahin aati

had se baḌh kar hasīn lagte ho

jhūTī qasmeñ zarūr khāyā karo

had se baDh kar hasin lagte ho

jhuTi qasmen zarur khaya karo

pahle baḌī raġhbat thī tire naam se mujh ko

ab sun ke tirā naam maiñ kuchh soch rahā huuñ

pahle baDi raghbat thi tere nam se mujh ko

ab sun ke tera nam main kuchh soch raha hun

ba.az auqāt kisī aur ke milne se 'adam'

apnī hastī se mulāqāt bhī ho jaatī hai

baz auqat kisi aur ke milne se 'adam'

apni hasti se mulaqat bhi ho jati hai

taḳhlīq-e-kā.enāt ke dilchasp jurm par

hañstā to hogā aap bhī yazdāñ kabhī kabhī

taKHliq-e-kaenat ke dilchasp jurm par

hansta to hoga aap bhi yazdan kabhi kabhi

shauqiya koī nahīñ hotā ġhalat

is meñ kuchh terī razā maujūd hai

shauqiya koi nahin hota ghalat

is mein kuchh teri raza maujud hai

kashtī chalā rahā hai magar kis adā ke saath

ham bhī na Duub jaa.eñ kahīñ nā-ḳhudā ke saath

kashti chala raha hai magar kis ada ke sath

hum bhi na Dub jaen kahin na-KHuda ke sath

ye kyā ki tum ne jafā se bhī haath khīñch liyā

mirī vafāoñ kā kuchh to sila diyā hotā

ye kya ki tum ne jafa se bhi hath khinch liya

meri wafaon ka kuchh to sila diya hota

kabhī to dair-o-haram se tū aa.egā vāpas

maiñ mai-kade meñ tirā intizār kar lūñgā

kabhi to dair-o-haram se tu aaega wapas

main mai-kade mein tera intizar kar lunga

sab ko pahuñchā ke un kī manzil par

aap raste meñ rah gayā huuñ maiñ

sab ko pahuncha ke un ki manzil par

aap raste mein rah gaya hun main

dekhā hai kis nigāh se tū ne sitam-zarīf

mahsūs ho rahā hai maiñ ġharq-e-sharāb huuñ

dekha hai kis nigah se tu ne sitam-zarif

mahsus ho raha hai main gharq-e-sharab hun

phir aaj 'adam' shaam se ġhamgīñ hai tabī.at

phir aaj sar-e-shām maiñ kuchh soch rahā huuñ

phir aaj 'adam' sham se ghamgin hai tabiat

phir aaj sar-e-sham main kuchh soch raha hun

chhup chhup ke jo aatā hai abhī merī galī meñ

ik roz mire saath sar-e-ām chalegā

chhup chhup ke jo aata hai abhi meri gali mein

ek roz mere sath sar-e-am chalega

har dil-fareb chiiz nazar kā ġhubār hai

āñkheñ hasīn hoñ to ḳhizāñ bhī bahār hai

har dil-fareb chiz nazar ka ghubar hai

aankhen hasin hon to KHizan bhi bahaar hai

mahshar meñ ik savāl kiyā thā karīm ne

mujh se vahāñ bhī aap kī tārīf ho ga.ī

mahshar mein ek sawal kiya tha karim ne

mujh se wahan bhi aap ki tarif ho gai

bole koī hañs kar to chhiḌak dete haiñ jaañ bhī

lekin koī rūThe to manāyā nahīñ jaatā

bole koi hans kar to chhiDak dete hain jaan bhi

lekin koi ruThe to manaya nahin jata

zindagī hai ik kirā.e kī ḳhushī

sūkhte tālāb kā paanī huuñ maiñ

zindagi hai ek kirae ki KHushi

sukhte talab ka pani hun main