kāñToñ se dil lagāo jo tā-umr saath deñ

phūloñ kā kyā jo saañs kī garmī na sah sakeñ

kanTon se dil lagao jo ta-umr sath den

phulon ka kya jo sans ki garmi na sah saken

ġham-e-zamāna ne majbūr kar diyā varna

ye aarzū thī ki bas terī aarzū karte

gham-e-zamana ne majbur kar diya warna

ye aarzu thi ki bas teri aarzu karte

un ras bharī āñkhoñ meñ hayā khel rahī hai

do zahr ke pyāloñ meñ qazā khel rahī hai

un ras bhari aankhon mein haya khel rahi hai

do zahr ke pyalon mein qaza khel rahi hai

inhī ġham kī ghaTāoñ se ḳhushī kā chāñd niklegā

añdherī raat ke parde meñ din kī raushnī bhī hai

inhi gham ki ghaTaon se KHushi ka chand niklega

andheri raat ke parde mein din ki raushni bhi hai

kuchh to tanhā.ī kī rātoñ meñ sahārā hotā

tum na hote na sahī zikr tumhārā hotā

kuchh to tanhai ki raaton mein sahaara hota

tum na hote na sahi zikr tumhaara hota

chaman meñ rahne vāloñ se to ham sahrā-nashīñ achchhe

bahār aa ke chalī jaatī hai vīrānī nahīñ jaatī

chaman mein rahne walon se to hum sahra-nashin achchhe

bahaar aa ke chali jati hai virani nahin jati

aarzū vasl kī rakhtī hai pareshāñ kyā kyā

kyā batā.ūñ ki mere dil meñ hai armāñ kyā kyā

aarzu wasl ki rakhti hai pareshan kya kya

kya bataun ki mere dil mein hai arman kya kya

uThte nahīñ haiñ ab to duā ke liye bhī haath

kis darja nā-umīd haiñ parvardigār se

uThte nahin hain ab to dua ke liye bhi hath

kis darja na-umid hain parwardigar se

kaam aa sakīñ na apnī vafā.eñ to kyā kareñ

us bevafā ko bhuul na jaa.eñ to kyā kareñ

kaam aa sakin na apni wafaen to kya karen

us bewafa ko bhul na jaen to kya karen

thak ga.e ham karte karte intizār

ik qayāmat un kā aanā ho gayā

thak gae hum karte karte intizar

ek qayamat un ka aana ho gaya

din raat mai-kade meñ guzartī thī zindagī

'aḳhtar' vo be-ḳhudī ke zamāne kidhar ga.e

din raat mai-kade mein guzarti thi zindagi

'aKHtar' wo be-KHudi ke zamane kidhar gae

kuchh is tarah se yaad aate rahe ho

ki ab bhuul jaane ko jī chāhtā hai

kuchh is tarah se yaad aate rahe ho

ki ab bhul jaane ko ji chahta hai

ḳhafā haiñ phir bhī aa kar chheḌ jaate haiñ tasavvur meñ

hamāre haal par kuchh mehrbānī ab bhī hotī hai

KHafa hain phir bhi aa kar chheD jate hain tasawwur mein

hamare haal par kuchh mehrbani ab bhi hoti hai

zindagī kitnī masarrat se guzartī yā rab

aish kī tarah agar ġham bhī gavārā hotā

zindagi kitni masarrat se guzarti ya rab

aish ki tarah agar gham bhi gawara hota

bhulā baiThe ho ham ko aaj lekin ye samajh lenā

bahut pachhtāoge jis vaqt ham kal yaad ā.eñge

bhula baiThe ho hum ko aaj lekin ye samajh lena

bahut pachhtaoge jis waqt hum kal yaad aaenge

maanā ki sab ke sāmne milne se hai hijāb

lekin vo ḳhvāb meñ bhī na aa.eñ to kyā kareñ

mana ki sab ke samne milne se hai hijab

lekin wo KHwab mein bhi na aaen to kya karen

yaad aao mujhe lillāh na tum yaad karo

merī aur apnī javānī ko na barbād karo

yaad aao mujhe lillah na tum yaad karo

meri aur apni jawani ko na barbaad karo

ab to miliye bas laḌā.ī ho chukī

ab to chaliye pyaar kī bāteñ kareñ

ab to miliye bas laDai ho chuki

ab to chaliye pyar ki baaten karen

ab vo bāteñ na vo rāteñ na mulāqāteñ haiñ

mahfileñ ḳhvāb kī sūrat huiiñ vīrāñ kyā kyā

ab wo baaten na wo raaten na mulaqaten hain

mahfilen KHwab ki surat huin viran kya kya

kisī maġhrūr ke aage hamārā sar nahīñ jhuktā

faqīrī meñ bhī 'aḳhtar' ġhairat-e-shāhāna rakhte haiñ

kisi maghrur ke aage hamara sar nahin jhukta

faqiri mein bhi 'aKHtar' ghairat-e-shahana rakhte hain

mohabbat ke iqrār se sharm kab tak

kabhī sāmnā ho to majbūr kar duuñ

mohabbat ke iqrar se sharm kab tak

kabhi samna ho to majbur kar dun

muddateñ ho ga.iiñ bichhḌe hue tum se lekin

aaj tak dil se mire yaad tumhārī na ga.ī

muddaten ho gain bichhDe hue tum se lekin

aaj tak dil se mere yaad tumhaari na gai

ishq ko naġhma-e-ummīd sunā de aa kar

dil kī soī huī qismat ko jagā de aa kar

ishq ko naghma-e-ummid suna de aa kar

dil ki soi hui qismat ko jaga de aa kar

mubārak mubārak nayā saal aayā

ḳhushī kā samāñ saarī duniyā pe chhāyā

mubarak mubarak naya sal aaya

KHushi ka saman sari duniya pe chhaya

raat bhar un kā tasavvur dil ko taḌpātā rahā

ek naqsha sāmne aatā rahā jaatā rahā

raat bhar un ka tasawwur dil ko taDpata raha

ek naqsha samne aata raha jata raha

vo agar aa na sake maut hī aa.ī hotī

hijr meñ koī to ġham-ḳhvār hamārā hotā

wo agar aa na sake maut hi aai hoti

hijr mein koi to gham-KHwar hamara hota

miT chale merī umīdoñ kī tarah harf magar

aaj tak tere ḳhatoñ se tirī ḳhushbū na ga.ī

miT chale meri umidon ki tarah harf magar

aaj tak tere KHaton se teri KHushbu na gai

ab jī meñ hai ki un ko bhulā kar hī dekh leñ

vo baar baar yaad jo aa.eñ to kyā kareñ

ab ji mein hai ki un ko bhula kar hi dekh len

wo bar bar yaad jo aaen to kya karen

palaT sī ga.ī hai zamāne kī kaayā

nayā saal aayā nayā saal aayā

palaT si gai hai zamane ki kaya

naya sal aaya naya sal aaya

ik din kī baat ho to use bhuul jaa.eñ ham

nāzil hoñ dil pe roz balā.eñ to kyā kareñ

ek din ki baat ho to use bhul jaen hum

nazil hon dil pe roz balaen to kya karen

ai dil vo āshiqī ke fasāne kidhar ga.e

vo umr kyā huī vo zamāne kidhar ga.e

ai dil wo aashiqi ke fasane kidhar gae

wo umr kya hui wo zamane kidhar gae

laundry kholī thī us ke ishq meñ

par vo kapḌe ham se dhulvātā nahīñ

laundry kholi thi us ke ishq mein

par wo kapDe hum se dhulwata nahin

in vafādārī ke vādoñ ko ilāhī kyā huā

vo vafā.eñ karne vaale bevafā kyuuñ ho ga.e

in wafadari ke wadon ko ilahi kya hua

wo wafaen karne wale bewafa kyun ho gae

tamannāoñ ko zinda ārzūoñ ko javāñ kar luuñ

ye sharmīlī nazar kah de to kuchh gustāḳhiyāñ kar luuñ

tamannaon ko zinda aarzuon ko jawan kar lun

ye sharmili nazar kah de to kuchh gustaKHiyan kar lun

mujhe hai e'tibār-e-va.ada lekin

tumheñ ḳhud e'tibār aa.e na aa.e

mujhe hai e'tibar-e-wada lekin

tumhein KHud e'tibar aae na aae

dil meñ letā hai chuTkiyāñ koī

haa.e is dard kī davā kyā hai

dil mein leta hai chuTkiyan koi

hae is dard ki dawa kya hai

ik vo ki ārzuoñ pe jiite haiñ umr bhar

ik ham ki haiñ abhī se pashīmān-e-ārzū!

ek wo ki aarzuon pe jite hain umr bhar

ek hum ki hain abhi se pashiman-e-arzu!

chaman vāloñ se mujh sahrā-nashīñ kī būd-o-bāsh achchhī

bahār aa kar chalī jaatī hai vīrānī nahīñ jaatī

chaman walon se mujh sahra-nashin ki bud-o-bash achchhi

bahaar aa kar chali jati hai virani nahin jati

ġham azīzoñ kā hasīnoñ kī judā.ī dekhī

dekheñ dikhlā.e abhī gardish-e-daurāñ kyā kyā

gham azizon ka hasinon ki judai dekhi

dekhen dikhlae abhi gardish-e-dauran kya kya

is tarah rail ke hamrāh ravāñ hai bādal

saath jaise koī uḌtā huā mai-ḳhāna chale

is tarah rail ke hamrah rawan hai baadal

sath jaise koi uDta hua mai-KHana chale

mujhe donoñ jahāñ meñ ek vo mil jaa.eñ gar 'aḳhtar'

to apnī hasratoñ ko be-niyāz-e-do-jahāñ kar luuñ

mujhe donon jahan mein ek wo mil jaen gar 'aKHtar'

to apni hasraton ko be-niyaz-e-do-jahan kar lun

bajā ki hai pās-e-hashr ham ko kareñge pās-e-shabāb pahle

hisāb hotā rahegā yā rab hameñ mañgā de sharāb pahle

baja ki hai pas-e-hashr hum ko karenge pas-e-shabab pahle

hisab hota rahega ya rab hamein manga de sharab pahle

pārsā.ī kī javāñ-margī na pūchh

tauba karnī thī ki badlī chhā ga.ī

parsai ki jawan-margi na puchh

tauba karni thi ki badli chha gai

ġham-e-āqibat hai na fikr-e-zamāna

piye jā rahe haiñ jiye jā rahe haiñ

gham-e-aqibat hai na fikr-e-zamana

piye ja rahe hain jiye ja rahe hain

jo bhī burā bhalā hai allāh jāntā hai

bande ke dil meñ kyā hai allāh jāntā hai

jo bhi bura bhala hai allah jaanta hai

bande ke dil mein kya hai allah jaanta hai

kis ko fursat thī zamāne ke sitam sahne kī

gar na us shoḳh kī āñkhoñ kā ishārā hotā

kis ko fursat thi zamane ke sitam sahne ki

gar na us shoKH ki aankhon ka ishaara hota

umr bhar kī talḳh bedārī kā sāmāñ ho ga.iiñ

haa.e vo rāteñ ki jo ḳhvāb-e-pareshāñ ho ga.iiñ

umr bhar ki talKH bedari ka saman ho gain

hae wo raaten ki jo KHwab-e-pareshan ho gain

hai qayāmat tire shabāb kā rañg

rañg badlegā phir zamāne kā

hai qayamat tere shabab ka rang

rang badlega phir zamane ka

kiyā hai aane kā va.ada to us ne

mere parvardigār aa.e na aa.e

kiya hai aane ka wada to us ne

mere parwardigar aae na aae

sū-e-kalkatta jo ham ba-dil-e-dīvāna chale

gungunāte hue ik shoḳh kā afsāna chale

su-e-kalkatta jo hum ba-dil-e-diwana chale

gungunate hue ek shoKH ka afsana chale