Sher on Dua

hayā nahīñ hai zamāne kī aañkh meñ baaqī

ḳhudā kare ki javānī tirī rahe be-dāġh

haya nahin hai zamane ki aankh mein baqi

KHuda kare ki jawani teri rahe be-dagh

abhī zinda hai maañ merī mujhe kuchh bhī nahīñ hogā

maiñ ghar se jab nikaltā huuñ duā bhī saath chaltī hai

abhi zinda hai man meri mujhe kuchh bhi nahin hoga

main ghar se jab nikalta hun dua bhi sath chalti hai

duā ko haat uThāte hue laraztā huuñ

kabhī duā nahīñ māñgī thī maañ ke hote hue

dua ko hat uThate hue larazta hun

kabhi dua nahin mangi thi man ke hote hue

jaate ho ḳhudā-hāfiz haañ itnī guzārish hai

jab yaad ham aa jaa.eñ milne kī duā karnā

jate ho KHuda-hafiz han itni guzarish hai

jab yaad hum aa jaen milne ki dua karna

auroñ kī burā.ī ko na dekhūñ vo nazar de

haañ apnī burā.ī ko parakhne kā hunar de

auron ki burai ko na dekhun wo nazar de

han apni burai ko parakhne ka hunar de

maraz-e-ishq jise ho use kyā yaad rahe

na davā yaad rahe aur na duā yaad rahe

maraz-e-ishq jise ho use kya yaad rahe

na dawa yaad rahe aur na dua yaad rahe

maiñ kyā karūñ mire qātil na chāhne par bhī

tire liye mire dil se duā nikaltī hai

main kya karun mere qatil na chahne par bhi

tere liye mere dil se dua nikalti hai

jab bhī kashtī mirī sailāb meñ aa jaatī hai

maañ duā kartī huī ḳhvāb meñ aa jaatī hai

jab bhi kashti meri sailab mein aa jati hai

man dua karti hui KHwab mein aa jati hai

abhī raah meñ ka.ī moḌ haiñ koī aa.egā koī jā.egā

tumheñ jis ne dil se bhulā diyā use bhūlne kī duā karo

abhi rah mein kai moD hain koi aaega koi jaega

tumhein jis ne dil se bhula diya use bhulne ki dua karo

mujhe zindagī kī duā dene vaale

hañsī aa rahī hai tirī sādgī par

mujhe zindagi ki dua dene wale

hansi aa rahi hai teri sadgi par

duā karo ki maiñ us ke liye duā ho jā.ūñ

vo ek shaḳhs jo dil ko duā sā lagtā hai

dua karo ki main us ke liye dua ho jaun

wo ek shaKHs jo dil ko dua sa lagta hai

koī chārā nahīñ duā ke sivā

koī suntā nahīñ ḳhudā ke sivā

koi chaara nahin dua ke siwa

koi sunta nahin KHuda ke siwa

hazār baar jo māñgā karo to kyā hāsil

duā vahī hai jo dil se kabhī nikaltī hai

hazar bar jo manga karo to kya hasil

dua wahi hai jo dil se kabhi nikalti hai

maañg luuñ tujh se tujhī ko ki sabhī kuchh mil jaa.e

sau savāloñ se yahī ek savāl achchhā hai

mang lun tujh se tujhi ko ki sabhi kuchh mil jae

sau sawalon se yahi ek sawal achchha hai

āḳhir duā kareñ bhī to kis mudda.ā ke saath

kaise zamīñ kī baat kaheñ āsmāñ se ham

aaKHir dua karen bhi to kis muddaa ke sath

kaise zamin ki baat kahen aasman se hum

duā.eñ yaad karā dī ga.ī thiiñ bachpan meñ

so zaḳhm khāte rahe aur duā diye ga.e ham

duaen yaad kara di gai thin bachpan mein

so zaKHm khate rahe aur dua diye gae hum

māñgī thī ek baar duā ham ne maut kī

sharminda aaj tak haiñ miyāñ zindagī se ham

mangi thi ek bar dua hum ne maut ki

sharminda aaj tak hain miyan zindagi se hum

māñgā kareñge ab se duā hijr-e-yār kī

āḳhir to dushmanī hai asar ko duā ke saath

manga karenge ab se dua hijr-e-yar ki

aaKHir to dushmani hai asar ko dua ke sath

duur rahtī haiñ sadā un se balā.eñ sāhil

apne maañ baap kī jo roz duā lete haiñ

dur rahti hain sada un se balaen sahil

apne man bap ki jo roz dua lete hain

kyuuñ maañg rahe ho kisī bārish kī duā.eñ

tum apne shikasta dar-o-dīvār to dekho

kyun mang rahe ho kisi barish ki duaen

tum apne shikasta dar-o-diwar to dekho

hotī nahīñ qubūl duā tark-e-ishq kī

dil chāhtā na ho to zabāñ meñ asar kahāñ

hoti nahin qubul dua tark-e-ishq ki

dil chahta na ho to zaban mein asar kahan

tum salāmat raho qayāmat tak

aur qayāmat kabhī na aa.e 'shād'

tum salamat raho qayamat tak

aur qayamat kabhi na aae 'shad'

jab lageñ zaḳhm to qātil ko duā dī jaa.e

hai yahī rasm to ye rasm uThā dī jaa.e

jab lagen zaKHm to qatil ko dua di jae

hai yahi rasm to ye rasm uTha di jae

maiñ zindagī kī duā māñgne lagā huuñ bahut

jo ho sake to duāoñ ko be-asar kar de

main zindagi ki dua mangne laga hun bahut

jo ho sake to duaon ko be-asar kar de

koī to phuul khilā.e duā ke lahje meñ

ajab tarah kī ghuTan hai havā ke lahje meñ

koi to phul khilae dua ke lahje mein

ajab tarah ki ghuTan hai hawa ke lahje mein

is liye chal na sakā koī bhī ḳhanjar mujh par

merī shah-rag pe mirī maañ kī duā rakkhī thī

is liye chal na saka koi bhi KHanjar mujh par

meri shah-rag pe meri man ki dua rakkhi thi

maiñ ne din raat ḳhudā se ye duā māñgī thī

koī aahaT na ho dar par mire jab tū aa.e

main ne din raat KHuda se ye dua mangi thi

koi aahaT na ho dar par mere jab tu aae

duā karo ki ye paudā sadā harā hī lage

udāsiyoñ meñ bhī chehra khilā khilā hī lage

dua karo ki ye pauda sada hara hi lage

udasiyon mein bhi chehra khila khila hi lage

na chārāgar kī zarūrat na kuchh davā kī hai

duā ko haath uThāo ki ġham kī raat kaTe

na chaaragar ki zarurat na kuchh dawa ki hai

dua ko hath uThao ki gham ki raat kaTe

ġham-e-dil ab kisī ke bas kā nahīñ

kyā davā kyā duā kare koī

gham-e-dil ab kisi ke bas ka nahin

kya dawa kya dua kare koi

baaqī hī kyā rahā hai tujhe māñgne ke baad

bas ik duā meñ chhūT ga.e har duā se ham

baqi hi kya raha hai tujhe mangne ke baad

bas ek dua mein chhuT gae har dua se hum

hai duā yaad magar harf-e-duā yaad nahīñ

mere naġhmāt ko andāz-e-navā yaad nahīñ

hai dua yaad magar harf-e-dua yaad nahin

mere naghmat ko andaz-e-nawa yaad nahin

vo baḌā rahīm o karīm hai mujhe ye sifat bhī atā kare

tujhe bhūlne kī duā karūñ to mirī duā meñ asar na ho

wo baDa rahim o karim hai mujhe ye sifat bhi ata kare

tujhe bhulne ki dua karun to meri dua mein asar na ho

kisī ne chuum ke āñkhoñ ko ye duā dī thī

zamīn terī ḳhudā motiyoñ se nam kar de

kisi ne chum ke aankhon ko ye dua di thi

zamin teri KHuda motiyon se nam kar de

buland hāthoñ meñ zanjīr Daal dete haiñ

ajiib rasm chalī hai duā na māñge koī

buland hathon mein zanjir Dal dete hain

ajib rasm chali hai dua na mange koi

haa.e koī davā karo haa.e koī duā karo

haa.e jigar meñ dard hai haa.e jigar ko kyā karūñ

hae koi dawa karo hae koi dua karo

hae jigar mein dard hai hae jigar ko kya karun

na jaane kaun sī manzil pe ishq aa pahuñchā

duā bhī kaam na aa.e koī davā na lage

na jaane kaun si manzil pe ishq aa pahuncha

dua bhi kaam na aae koi dawa na lage

guzishta saal koī maslahat rahī hogī

guzishta saal ke sukh ab ke saal de maulā

guzishta sal koi maslahat rahi hogi

guzishta sal ke sukh ab ke sal de maula

dushman-e-jāñ hī sahī dost samajhtā huuñ use

bad-duā jis kī mujhe ban ke duā lagtī hai

dushman-e-jaan hi sahi dost samajhta hun use

bad-dua jis ki mujhe ban ke dua lagti hai

abhī diloñ kī tanāboñ meñ saḳhtiyāñ haiñ bahut

abhī hamārī duā meñ asar nahīñ aayā

abhi dilon ki tanabon mein saKHtiyan hain bahut

abhi hamari dua mein asar nahin aaya

ye bastiyāñ haiñ ki maqtal duā kiye jaa.eñ

duā ke din haiñ musalsal duā kiye jaa.eñ

ye bastiyan hain ki maqtal dua kiye jaen

dua ke din hain musalsal dua kiye jaen

sunte haiñ jo bahisht kī tārīf sab durust

lekin ḳhudā kare vo tirā jalva-gāh ho

sunte hain jo bahisht ki tarif sab durust

lekin KHuda kare wo tera jalwa-gah ho

ye mo.ajaza bhī kisī kī duā kā lagtā hai

ye shahr ab bhī usī be-vafā kā lagtā hai

ye moajaza bhi kisi ki dua ka lagta hai

ye shahr ab bhi usi be-wafa ka lagta hai

us dushman-e-vafā ko duā de rahā huuñ maiñ

merā na ho sakā vo kisī kā to ho gayā

us dushman-e-wafa ko dua de raha hun main

mera na ho saka wo kisi ka to ho gaya

hijr kī shab nāla-e-dil vo sadā dene lage

sunñe vaale raat kaTne kī duā dene lage

hijr ki shab nala-e-dil wo sada dene lage

sunne wale raat kaTne ki dua dene lage

ye iltijā duā ye tamannā fuzūl hai

sūkhī nadī ke paas samundar na jā.egā

ye iltija dua ye tamanna fuzul hai

sukhi nadi ke pas samundar na jaega

mire liye na ruk sake to kyā huā

jahāñ kahīñ Thahar ga.e ho ḳhush raho

mere liye na ruk sake to kya hua

jahan kahin Thahar gae ho KHush raho

maut māñgī thī ḳhudā.ī to nahīñ māñgī thī

le duā kar chuke ab tark-e-duā karte haiñ

maut mangi thi KHudai to nahin mangi thi

le dua kar chuke ab tark-e-dua karte hain

kaun detā hai mohabbat ko parastish kā maqām

tum ye insāf se socho to duā do ham ko

kaun deta hai mohabbat ko parastish ka maqam

tum ye insaf se socho to dua do hum ko

takmīl-e-ārzū se bhī hotā hai ġham kabhī

aisī duā na maañg jise bad-duā kaheñ

takmil-e-arzu se bhi hota hai gham kabhi

aisi dua na mang jise bad-dua kahen