vo to ḳhush-bū hai havāoñ meñ bikhar jā.egā

mas.ala phuul kā hai phuul kidhar jā.egā

wo to KHush-bu hai hawaon mein bikhar jaega

masala phul ka hai phul kidhar jaega

husn ke samajhne ko umr chāhiye jānāñ

do ghaḌī kī chāhat meñ laḌkiyāñ nahīñ khultīñ

husn ke samajhne ko umr chahiye jaanan

do ghaDi ki chahat mein laDkiyan nahin khultin

maiñ sach kahūñgī magar phir bhī haar jā.ūñgī

vo jhuuT bolegā aur lā-javāb kar degā

main sach kahungi magar phir bhi haar jaungi

wo jhuT bolega aur la-jawab kar dega

vo kahīñ bhī gayā lauTā to mire paas aayā

bas yahī baat hai achchhī mire harjā.ī kī

wo kahin bhi gaya lauTa to mere pas aaya

bas yahi baat hai achchhi mere harjai ki

kaise kah duuñ ki mujhe chhoḌ diyā hai us ne

baat to sach hai magar baat hai rusvā.ī kī

kaise kah dun ki mujhe chhoD diya hai us ne

baat to sach hai magar baat hai ruswai ki

itne ghane bādal ke pīchhe

kitnā tanhā hogā chāñd

itne ghane baadal ke pichhe

kitna tanha hoga chand

merī talab thā ek shaḳhs vo jo nahīñ milā to phir

haath duā se yuuñ girā bhuul gayā savāl bhī

meri talab tha ek shaKHs wo jo nahin mila to phir

hath dua se yun gira bhul gaya sawal bhi

kuchh to tire mausam hī mujhe raas kam aa.e

aur kuchh mirī miTTī meñ baġhāvat bhī bahut thī

kuchh to tere mausam hi mujhe ras kam aae

aur kuchh meri miTTi mein baghawat bhi bahut thi

kuchh to havā bhī sard thī kuchh thā tirā ḳhayāl bhī

dil ko ḳhushī ke saath saath hotā rahā malāl bhī

kuchh to hawa bhi sard thi kuchh tha tera KHayal bhi

dil ko KHushi ke sath sath hota raha malal bhi

vo na aa.egā hameñ ma.alūm thā is shaam bhī

intizār us kā magar kuchh soch kar karte rahe

wo na aaega hamein malum tha is sham bhi

intizar us ka magar kuchh soch kar karte rahe

vo mujh ko chhoḌ ke jis aadmī ke paas gayā

barābarī kā bhī hotā to sabr aa jaatā

wo mujh ko chhoD ke jis aadmi ke pas gaya

barabari ka bhi hota to sabr aa jata

ham to samjhe the ki ik zaḳhm hai bhar jā.egā

kyā ḳhabar thī ki rag-e-jāñ meñ utar jā.egā

hum to samjhe the ki ek zaKHm hai bhar jaega

kya KHabar thi ki rag-e-jaan mein utar jaega

chalne kā hausla nahīñ ruknā muhāl kar diyā

ishq ke is safar ne to mujh ko niDhāl kar diyā

chalne ka hausla nahin rukna muhaal kar diya

ishq ke is safar ne to mujh ko niDhaal kar diya

dushmanoñ ke saath mere dost bhī āzād haiñ

dekhnā hai khīñchtā hai mujh pe pahlā tiir kaun

dushmanon ke sath mere dost bhi aazad hain

dekhna hai khinchta hai mujh pe pahla tir kaun

ab to is raah se vo shaḳhs guzartā bhī nahīñ

ab kis ummīd pe darvāze se jhāñke koī

ab to is rah se wo shaKHs guzarta bhi nahin

ab kis ummid pe darwaze se jhanke koi

baat vo aadhī raat kī raat vo puure chāñd kī

chāñd bhī ain chait kā us pe tirā jamāl bhī

baat wo aadhi raat ki raat wo pure chand ki

chand bhi ain chait ka us pe tera jamal bhi

yuuñ bichhaḌnā bhī bahut āsāñ na thā us se magar

jaate jaate us kā vo muḌ kar dobāra dekhnā

yun bichhaDna bhi bahut aasan na tha us se magar

jate jate us ka wo muD kar dobara dekhna

raat ke shāyad ek baje haiñ

sotā hogā merā chāñd

raat ke shayad ek baje hain

sota hoga mera chand

mumkina faisloñ meñ ek hijr kā faisla bhī thā

ham ne to ek baat kī us ne kamāl kar diyā

mumkina faislon mein ek hijr ka faisla bhi tha

hum ne to ek baat ki us ne kamal kar diya

ab bhī barsāt kī rātoñ meñ badan TūTtā hai

jaag uThtī haiñ ajab ḳhvāhisheñ añgḌā.ī kī

ab bhi barsat ki raaton mein badan TuTta hai

jag uThti hain ajab KHwahishen angDai ki

bas ye huā ki us ne takalluf se baat kī

aur ham ne rote rote dupaTTe bhigo liye

bas ye hua ki us ne takalluf se baat ki

aur hum ne rote rote dupaTTe bhigo liye

maiñ phuul chuntī rahī aur mujhe ḳhabar na huī

vo shaḳhs aa ke mire shahr se chalā bhī gayā

main phul chunti rahi aur mujhe KHabar na hui

wo shaKHs aa ke mere shahr se chala bhi gaya

us ne jaltī huī peshānī pe jab haath rakhā

ruuh tak aa ga.ī tāsīr masīhā.ī kī

us ne jalti hui peshani pe jab hath rakha

ruh tak aa gai tasir masihai ki

laḌkiyoñ ke dukh ajab hote haiñ sukh us se ajiib

hañs rahī haiñ aur kājal bhīgtā hai saath saath

laDkiyon ke dukh ajab hote hain sukh us se ajib

hans rahi hain aur kajal bhigta hai sath sath

maiñ us kī dastaras meñ huuñ magar vo

mujhe merī razā se māñgtā hai

main us ki dastaras mein hun magar wo

mujhe meri raza se mangta hai

bahut se log the mehmān mere ghar lekin

vo jāntā thā ki hai ehtimām kis ke liye

bahut se log the mehman mere ghar lekin

wo jaanta tha ki hai ehtimam kis ke liye

jis tarah ḳhvāb mire ho ga.e reza reza

us tarah se na kabhī TuuT ke bikhre koī

jis tarah KHwab mere ho gae reza reza

us tarah se na kabhi TuT ke bikhre koi

kaañp uThtī huuñ maiñ ye soch ke tanhā.ī meñ

mere chehre pe tirā naam na paḌh le koī

kanp uThti hun main ye soch ke tanhai mein

mere chehre pe tera nam na paDh le koi

hārne meñ ik anā kī baat thī

jiit jaane meñ ḳhasārā aur hai

haarne mein ek ana ki baat thi

jit jaane mein KHasara aur hai

yahī vo din the jab ik dūsre ko paayā thā

hamārī sāl-girah Thiik ab ke maah meñ hai

yahi wo din the jab ek dusre ko paya tha

hamari sal-girah Thik ab ke mah mein hai

ek sūraj thā ki tāroñ ke gharāne se uThā

aañkh hairān hai kyā shaḳhs zamāne se uThā

ek suraj tha ki taron ke gharane se uTha

aankh hairan hai kya shaKHs zamane se uTha

kamāl-e-zabt ko ḳhud bhī to āzmā.ūñgī

maiñ apne haath se us kī dulhan sajā.ūñgī

kamal-e-zabt ko KHud bhi to aazmaungi

main apne hath se us ki dulhan sajaungi

aamad pe terī itr o charāġh o subū na hoñ

itnā bhī būd-o-bāsh ko saada nahīñ kiyā

aamad pe teri itr o charagh o subu na hon

itna bhi bud-o-bash ko sada nahin kiya

jugnū ko din ke vaqt parakhne kī zid kareñ

bachche hamāre ahd ke chālāk ho ga.e

jugnu ko din ke waqt parakhne ki zid karen

bachche hamare ahd ke chaalak ho gae

us ke yuuñ tark-e-mohabbat kā sabab hogā koī

jī nahīñ ye māntā vo bevafā pahle se thā

us ke yun tark-e-mohabbat ka sabab hoga koi

ji nahin ye manta wo bewafa pahle se tha

bārhā terā intizār kiyā

apne ḳhvāboñ meñ ik dulhan kī tarah

barha tera intizar kiya

apne KHwabon mein ek dulhan ki tarah

kal raat jo īñdhan ke liye kaT ke girā hai

chiḌiyoñ ko bahut pyaar thā us būḌhe shajar se

kal raat jo indhan ke liye kaT ke gira hai

chiDiyon ko bahut pyar tha us buDhe shajar se

kabhī kabhār use dekh leñ kahīñ mil leñ

ye kab kahā thā ki vo ḳhush-badan hamārā ho

kabhi kabhaar use dekh len kahin mil len

ye kab kaha tha ki wo KHush-badan hamara ho

kuchh faisla to ho ki kidhar jaanā chāhiye

paanī ko ab to sar se guzar jaanā chāhiye

kuchh faisla to ho ki kidhar jaana chahiye

pani ko ab to sar se guzar jaana chahiye

tujhe manā.ūñ ki apnī anā kī baat sunūñ

ulajh rahā hai mire faisloñ kā resham phir

tujhe manaun ki apni ana ki baat sunun

ulajh raha hai mere faislon ka resham phir

us ne mujhe dar-asl kabhī chāhā hī nahīñ thā

ḳhud ko de kar ye bhī dhokā, dekh liyā hai

us ne mujhe dar-asl kabhi chaha hi nahin tha

KHud ko de kar ye bhi dhoka, dekh liya hai

chehra o naam ek saath aaj na yaad aa sake

vaqt ne kis shabīh ko ḳhvāb o ḳhayāl kar diyā

chehra o nam ek sath aaj na yaad aa sake

waqt ne kis shabih ko KHwab o KHayal kar diya

tū badaltā hai to be-sāḳhta merī āñkheñ

apne hāthoñ kī lakīroñ se ulajh jaatī haiñ

tu badalta hai to be-saKHta meri aankhen

apne hathon ki lakiron se ulajh jati hain

apne qātil kī zehānat se pareshān huuñ maiñ

roz ik maut na.e tarz kī ījād kare

apne qatil ki zehanat se pareshan hun main

roz ek maut nae tarz ki ijad kare

raa.e pahle se banā lī tū ne

dil meñ ab ham tire ghar kyā karte

rae pahle se bana li tu ne

dil mein ab hum tere ghar kya karte

kaun jaane ki na.e saal meñ tū kis ko paḌhe

terā me.yār badaltā hai nisāboñ kī tarah

kaun jaane ki nae sal mein tu kis ko paDhe

tera meyar badalta hai nisabon ki tarah

apnī rusvā.ī tire naam kā charchā dekhūñ

ik zarā sher kahūñ aur maiñ kyā kyā dekhūñ

apni ruswai tere nam ka charcha dekhun

ek zara sher kahun aur main kya kya dekhun

aks-e-ḳhushbū huuñ bikharne se na roke koī

aur bikhar jā.ūñ to mujh ko na sameTe koī

aks-e-KHushbu hun bikharne se na roke koi

aur bikhar jaun to mujh ko na sameTe koi

na jaane kaun sā aaseb dil meñ bastā hai

ki jo bhī Thahrā vo āḳhir makān chhoḌ gayā

na jaane kaun sa aaseb dil mein basta hai

ki jo bhi Thahra wo aaKHir makan chhoD gaya

raste meñ mil gayā to sharīk-e-safar na jaan

jo chhāñv mehrbāñ ho use apnā ghar na jaan

raste mein mil gaya to sharik-e-safar na jaan

jo chhanw mehrban ho use apna ghar na jaan