Sher on Ishq

husn ik dilrubā hukūmat hai

ishq ik qudratī ġhulāmī hai

husn ek dilruba hukumat hai

ishq ek qudrati ghulami hai

ik roz khel khel meñ ham us ke ho ga.e

aur phir tamām umr kisī ke nahīñ hue

ek roz khel khel mein hum us ke ho gae

aur phir tamam umr kisi ke nahin hue

un kā ġham un kā tasavvur un ke shikve ab kahāñ

ab to ye bāteñ bhī ai dil ho ga.iiñ aa.ī ga.ī

un ka gham un ka tasawwur un ke shikwe ab kahan

ab to ye baaten bhi ai dil ho gain aai gai

jazba-e-ishq salāmat hai to inshā-allāh

kachche dhāge se chale ā.eñge sarkār bañdhe

jazba-e-ishq salamat hai to insha-allah

kachche dhage se chale aaenge sarkar bandhe

maañg luuñ tujh se tujhī ko ki sabhī kuchh mil jaa.e

sau savāloñ se yahī ek savāl achchhā hai

mang lun tujh se tujhi ko ki sabhi kuchh mil jae

sau sawalon se yahi ek sawal achchha hai

ishq meñ kyā nuqsān naf.a hai ham ko kyā samjhāte ho

ham ne saarī umr hī yaaro dil kā kārobār kiyā

ishq mein kya nuqsan nafa hai hum ko kya samjhate ho

hum ne sari umr hi yaro dil ka karobar kiya

bulbul ke kārobār pe haiñ ḳhanda-hā-e-gul

kahte haiñ jis ko ishq ḳhalal hai dimāġh kā

bulbul ke karobar pe hain KHanda-ha-e-gul

kahte hain jis ko ishq KHalal hai dimagh ka

us ke baare meñ bahut sochtā huuñ

mujh se bichhḌā to kidhar jā.egā

us ke bare mein bahut sochta hun

mujh se bichhDa to kidhar jaega

aziiz itnā hī rakkho ki jī sambhal jaa.e

ab is qadar bhī na chāho ki dam nikal jaa.e

aziz itna hi rakkho ki ji sambhal jae

ab is qadar bhi na chaho ki dam nikal jae

kyā milā tum ko mire ishq kā charchā kar ke

tum bhī rusvā hue āḳhir mujhe rusvā kar ke

kya mila tum ko mere ishq ka charcha kar ke

tum bhi ruswa hue aaKHir mujhe ruswa kar ke

ye mohabbat bhī ek nekī hai

is ko dariyā meñ Daal aate haiñ

ye mohabbat bhi ek neki hai

is ko dariya mein Dal aate hain

mujhe to qaid-e-mohabbat aziiz thī lekin

kisī ne mujh ko giraftār kar ke chhoḌ diyā

mujhe to qaid-e-mohabbat aziz thi lekin

kisi ne mujh ko giraftar kar ke chhoD diya

baat niklegī to phir duur talak jā.egī

log be-vaj.h udāsī kā sabab pūchheñge

baat niklegi to phir dur talak jaegi

log be-wajh udasi ka sabab puchhenge

'sahar' ab hogā merā zikr bhī raushan-dimāġhoñ meñ

mohabbat naam kī ik rasm-e-bejā chhoḌ dī maiñ ne

'sahar' ab hoga mera zikr bhi raushan-dimaghon mein

mohabbat nam ki ek rasm-e-beja chhoD di main ne

na milne par bhī use 'aish' pyaar kartā huuñ

yuuñ ūñchā kar diyā me.ār-e-zindagī maiñ ne

na milne par bhi use 'aish' pyar karta hun

yun uncha kar diya mear-e-zindagi main ne

hamāre ishq meñ rusvā hue tum

magar ham to tamāshā ho ga.e haiñ

hamare ishq mein ruswa hue tum

magar hum to tamasha ho gae hain

mohabbat kī to koī had, koī sarhad nahīñ hotī

hamāre darmiyāñ ye fāsle, kaise nikal aa.e

mohabbat ki to koi had, koi sarhad nahin hoti

hamare darmiyan ye fasle, kaise nikal aae

jurm-e-ulfat pe hameñ log sazā dete haiñ

kaise nādān haiñ sho.aloñ ko havā dete haiñ

jurm-e-ulfat pe hamein log saza dete hain

kaise nadan hain shoalon ko hawa dete hain

tum nahīñ paas koī paas nahīñ

ab mujhe zindagī kī aas nahīñ

tum nahin pas koi pas nahin

ab mujhe zindagi ki aas nahin

ik shakl hameñ phir bhaa.ī hai ik sūrat dil meñ samā.ī hai

ham aaj bahut sarshār sahī par aglā moḌ judā.ī hai

ek shakl hamein phir bhai hai ek surat dil mein samai hai

hum aaj bahut sarshaar sahi par agla moD judai hai

charchā hamārā ishq ne kyuuñ jā-ba-jā kiyā

dil us ko de diyā to bhalā kyā burā kiyā

charcha hamara ishq ne kyun ja-ba-ja kiya

dil us ko de diya to bhala kya bura kiya

tujh se mirā muāmla hotā ba-rāh-e-rāst

ye ishq darmiyān na hotā to Thiik thā

tujh se mera muamla hota ba-rah-e-rast

ye ishq darmiyan na hota to Thik tha

rahegā saath tirā pyaar zindagī ban kar

ye aur baat mirī zindagī vafā na kare

rahega sath tera pyar zindagi ban kar

ye aur baat meri zindagi wafa na kare

tumhārā naam likhne kī ijāzat chhin ga.ī jab se

koī bhī lafz likhtā huuñ to āñkheñ bhiig jaatī haiñ

tumhaara nam likhne ki ijazat chhin gai jab se

koi bhi lafz likhta hun to aankhen bhig jati hain

tum se mil kar imlī mīThī lagtī hai

tum se bichhaḌ kar shahad bhī khārā lagtā hai

tum se mil kar imli miThi lagti hai

tum se bichhaD kar shahad bhi khaara lagta hai

mohabbat ek dam dukh kā mudāvā kar nahīñ detī

ye titlī baiThtī hai zaḳhm par āhista āhista

mohabbat ek dam dukh ka mudawa kar nahin deti

ye titli baiThti hai zaKHm par aahista aahista

is ta.alluq meñ nahīñ mumkin talāq

ye mohabbat hai koī shādī nahīñ

is talluq mein nahin mumkin talaq

ye mohabbat hai koi shadi nahin

is maraz se koī bachā bhī hai

chārāgar ishq kī davā bhī hai

is maraz se koi bacha bhi hai

chaaragar ishq ki dawa bhi hai

ik khilaunā TuuT jā.egā nayā mil jā.egā

maiñ nahīñ to koī tujh ko dūsrā mil jā.egā

ek khilauna TuT jaega naya mil jaega

main nahin to koi tujh ko dusra mil jaega

ek chehra hai jo āñkhoñ meñ basā rahtā hai

ik tasavvur hai jo tanhā nahīñ hone detā

ek chehra hai jo aankhon mein basa rahta hai

ek tasawwur hai jo tanha nahin hone deta

jab kabhī ham ne kiyā ishq pashemān hue

zindagī hai to abhī aur pashemāñ hoñge

jab kabhi hum ne kiya ishq pasheman hue

zindagi hai to abhi aur pasheman honge

donoñ jahān terī mohabbat meñ haar ke

vo jā rahā hai koī shab-e-ġham guzār ke

donon jahan teri mohabbat mein haar ke

wo ja raha hai koi shab-e-gham guzar ke

vo shaḳhs jis ko dil o jaañ se baḌh ke chāhā thā

bichhaḌ gayā to ba-zāhir koī malāl nahīñ

wo shaKHs jis ko dil o jaan se baDh ke chaha tha

bichhaD gaya to ba-zahir koi malal nahin

ye mere ishq kī majbūriyāñ ma.āz-allāh

tumhārā raaz tumhīñ se chhupā rahā huuñ maiñ

ye mere ishq ki majburiyan maaz-allah

tumhaara raaz tumhin se chhupa raha hun main

vo to ḳhush-bū hai havāoñ meñ bikhar jā.egā

mas.ala phuul kā hai phuul kidhar jā.egā

wo to KHush-bu hai hawaon mein bikhar jaega

masala phul ka hai phul kidhar jaega

mohabbat meñ kaThin raste bahut āsān lagte the

pahāḌoñ par suhulat se chaḌhā karte the ham donoñ

mohabbat mein kaThin raste bahut aasan lagte the

pahaDon par suhulat se chaDha karte the hum donon

tamāshā dekh rahe the jo Dūbne kā mire

mirī talāsh meñ nikle haiñ kashtiyāñ le kar

tamasha dekh rahe the jo Dubne ka mere

meri talash mein nikle hain kashtiyan le kar

vo kahīñ bhī gayā lauTā to mire paas aayā

bas yahī baat hai achchhī mire harjā.ī kī

wo kahin bhi gaya lauTa to mere pas aaya

bas yahi baat hai achchhi mere harjai ki

us ko judā hue bhī zamāna bahut huā

ab kyā kaheñ ye qissa purānā bahut huā

us ko juda hue bhi zamana bahut hua

ab kya kahen ye qissa purana bahut hua

kyuuñ hijr ke shikve kartā hai kyuuñ dard ke rone rotā hai

ab ishq kiyā to sabr bhī kar is meñ to yahī kuchh hotā hai

kyun hijr ke shikwe karta hai kyun dard ke rone rota hai

ab ishq kiya to sabr bhi kar is mein to yahi kuchh hota hai

jo ho sakā na mirā us ko bhuul jā.ūñ maiñ

parā.ī aag meñ kyuuñ uñgliyāñ jalā.ūñ maiñ

jo ho saka na mera us ko bhul jaun main

parai aag mein kyun ungliyan jalaun main

ishq hai ishq karne vāloñ ko

kaisā kaisā baham kyā hai ishq

ishq hai ishq karne walon ko

kaisa kaisa baham kya hai ishq

haañ kuchh bhī to derīna mohabbat kā bharam rakh

dil se na aa duniyā ko dikhāne ke liye aa

han kuchh bhi to derina mohabbat ka bharam rakh

dil se na aa duniya ko dikhane ke liye aa

maiñ chāhtā huuñ ki tum hī mujhe ijāzat do

tumhārī tarah se koī gale lagā.e mujhe

main chahta hun ki tum hi mujhe ijazat do

tumhaari tarah se koi gale lagae mujhe

na jaane kaisā samundar hai ishq kā jis meñ

kisī ko dekhā nahīñ Duub ke ubharte hue

na jaane kaisa samundar hai ishq ka jis mein

kisi ko dekha nahin Dub ke ubharte hue

mohabbat kā un ko yaqīñ aa chalā hai

haqīqat bane jā rahe haiñ fasāne

mohabbat ka un ko yaqin aa chala hai

haqiqat bane ja rahe hain fasane

sabr bin aur kuchh na lo hamrāh

kūcha-e-ishq tañg hai yaaro

sabr bin aur kuchh na lo hamrah

kucha-e-ishq tang hai yaro

kitnī lambī ḳhāmoshī se guzrā huuñ

un se kitnā kuchh kahne kī koshish kī

kitni lambi KHamoshi se guzra hun

un se kitna kuchh kahne ki koshish ki

jo dil rakhte haiñ siine meñ vo kāfir ho nahīñ sakte

mohabbat diin hotī hai vafā īmān hotī hai

jo dil rakhte hain sine mein wo kafir ho nahin sakte

mohabbat din hoti hai wafa iman hoti hai

ishq ke marāhil meñ vo bhī vaqt aatā hai

āfateñ barastī haiñ dil sukūn paatā hai

ishq ke marahil mein wo bhi waqt aata hai

aafaten barasti hain dil sukun pata hai