Sher on Visaal

aur bhī dukh haiñ zamāne meñ mohabbat ke sivā

rāhateñ aur bhī haiñ vasl kī rāhat ke sivā

aur bhi dukh hain zamane mein mohabbat ke siwa

rahaten aur bhi hain wasl ki rahat ke siwa

ye na thī hamārī qismat ki visāl-e-yār hotā

agar aur jiite rahte yahī intizār hotā

ye na thi hamari qismat ki visal-e-yar hota

agar aur jite rahte yahi intizar hota

nahīñ nigāh meñ manzil to justujū hī sahī

nahīñ visāl mayassar to aarzū hī sahī

nahin nigah mein manzil to justuju hi sahi

nahin visal mayassar to aarzu hi sahi

aaj dekhā hai tujh ko der ke ba.ad

aaj kā din guzar na jaa.e kahīñ

aaj dekha hai tujh ko der ke baad

aaj ka din guzar na jae kahin

jān-levā thiiñ ḳhvāhisheñ varna

vasl se intizār achchhā thā

jaan-lewa thin KHwahishen warna

wasl se intizar achchha tha

shab-e-visāl hai gul kar do in charāġhoñ ko

ḳhushī kī bazm meñ kyā kaam jalne vāloñ kā

shab-e-visal hai gul kar do in charaghon ko

KHushi ki bazm mein kya kaam jalne walon ka

vasl kā din aur itnā muḳhtasar

din gine jaate the is din ke liye

wasl ka din aur itna muKHtasar

din gine jate the is din ke liye

sau chāñd bhī chamkeñge to kyā baat banegī

tum aa.e to is raat kī auqāt banegī

sau chand bhi chamkenge to kya baat banegi

tum aae to is raat ki auqat banegi

bhalā ham mile bhī to kyā mile vahī dūriyāñ vahī fāsle

na kabhī hamāre qadam baḌhe na kabhī tumhārī jhijak ga.ī

bhala hum mile bhi to kya mile wahi duriyan wahi fasle

na kabhi hamare qadam baDhe na kabhi tumhaari jhijak gai

ye aarzū bhī baḌī chiiz hai magar hamdam

visāl-e-yār faqat aarzū kī baat nahīñ

ye aarzu bhi baDi chiz hai magar hamdam

visal-e-yar faqat aarzu ki baat nahin

zarā visāl ke ba.ad aa.ina to dekh ai dost

tire jamāl kī doshīzgī nikhar aa.ī

zara visal ke baad aaina to dekh ai dost

tere jamal ki doshizgi nikhar aai

chand kaliyāñ nashāt kī chun kar muddatoñ mahv-e-yās rahtā huuñ

terā milnā ḳhushī kī baat sahī tujh se mil kar udaas rahtā huuñ

chand kaliyan nashat ki chun kar muddaton mahw-e-yas rahta hun

tera milna KHushi ki baat sahi tujh se mil kar udas rahta hun

vasl meñ rañg uḌ gayā merā

kyā judā.ī ko muñh dikhā.ūñgā

wasl mein rang uD gaya mera

kya judai ko munh dikhaunga

vasl ho yā firāq ho 'akbar'

jāgnā raat bhar musībat hai

wasl ho ya firaq ho 'akbar'

jagna raat bhar musibat hai

os se pyaas kahāñ bujhtī hai

mūslā-dhār baras merī jaan

os se pyas kahan bujhti hai

musla-dhaar baras meri jaan

guzarne hī na dī vo raat maiñ ne

ghaḌī par rakh diyā thā haath maiñ ne

guzarne hi na di wo raat main ne

ghaDi par rakh diya tha hath main ne

us se milne kī ḳhushī ba.ad meñ dukh detī hai

jashn ke ba.ad kā sannāTā bahut khaltā hai

us se milne ki KHushi baad mein dukh deti hai

jashn ke baad ka sannaTa bahut khalta hai

vo gale se lipaT ke sote haiñ

āj-kal garmiyāñ haiñ jāḌoñ meñ

wo gale se lipaT ke sote hain

aaj-kal garmiyan hain jaDon mein

'farāz' ishq kī duniyā to ḳhūb-sūrat thī

ye kis ne fitna-e-hijr-o-visāl rakkhā hai

'faraaz' ishq ki duniya to KHub-surat thi

ye kis ne fitna-e-hijr-o-visal rakkha hai

aarzū vasl kī rakhtī hai pareshāñ kyā kyā

kyā batā.ūñ ki mere dil meñ hai armāñ kyā kyā

aarzu wasl ki rakhti hai pareshan kya kya

kya bataun ki mere dil mein hai arman kya kya

phir baiThe baiThe vāda-e-vasl us ne kar liyā

phir uTh khaḌā huā vahī rog intizār kā

phir baiThe baiThe wada-e-wasl us ne kar liya

phir uTh khaDa hua wahi rog intizar ka

tum kahāñ vasl kahāñ vasl kī ummīd kahāñ

dil ke bahkāne ko ik baat banā rakhī hai

tum kahan wasl kahan wasl ki ummid kahan

dil ke bahkane ko ek baat bana rakhi hai

maiñ samajhtā huuñ ki hai jannat o dozaḳh kyā chiiz

ek hai vasl tirā ek hai furqat terī

main samajhta hun ki hai jannat o dozaKH kya chiz

ek hai wasl tera ek hai furqat teri

visāl-e-yār kī ḳhvāhish meñ aksar

charāġh-e-shām se pahle jalā huuñ

visal-e-yar ki KHwahish mein aksar

charagh-e-sham se pahle jala hun

kahāñ ham kahāñ vasl-e-jānāñ kī 'hasrat'

bahut hai unheñ ik nazar dekh lenā

kahan hum kahan wasl-e-jaanan ki 'hasrat'

bahut hai unhen ek nazar dekh lena

armān vasl kā mirī nazroñ se taaḌ ke

pahle hī se vo baiTh ga.e muñh bigāḌ ke

arman wasl ka meri nazron se taD ke

pahle hi se wo baiTh gae munh bigaD ke

tirā vasl hai mujhe be-ḳhudī tirā hijr hai mujhe āgahī

tirā vasl mujh ko firāq hai tirā hijr mujh ko visāl hai

tera wasl hai mujhe be-KHudi tera hijr hai mujhe aagahi

tera wasl mujh ko firaq hai tera hijr mujh ko visal hai

ik raat dil-jaloñ ko ye aish-e-visāl de

phir chāhe āsmān jahannam meñ Daal de

ek raat dil-jalon ko ye aish-e-visal de

phir chahe aasman jahannam mein Dal de

dhaḌaktī qurbatoñ ke ḳhvāb se jaage to jaanā

zarā se vasl ne kitnā akelā kar diyā hai

dhaDakti qurbaton ke KHwab se jage to jaana

zara se wasl ne kitna akela kar diya hai

use ḳhabar hai ki anjām-e-vasl kyā hogā

vo qurbatoñ kī tapish fāsle meñ rakhtī hai

use KHabar hai ki anjam-e-wasl kya hoga

wo qurbaton ki tapish fasle mein rakhti hai

dost dil rakhne ko karte haiñ bahāne kyā kyā

roz jhūTī ḳhabar-e-vasl sunā jaate haiñ

dost dil rakhne ko karte hain bahane kya kya

roz jhuTi KHabar-e-wasl suna jate hain

rakh na aañsū se vasl kī ummīd

khāre paanī se daal galtī nahīñ

rakh na aansu se wasl ki ummid

khaare pani se dal galti nahin

vasl ho jaa.e yahīñ hashr meñ kyā rakkhā hai

aaj kī baat ko kyuuñ kal pe uThā rakkhā hai

wasl ho jae yahin hashr mein kya rakkha hai

aaj ki baat ko kyun kal pe uTha rakkha hai

hijr o visāl charāġh haiñ donoñ tanhā.ī ke tāqoñ meñ

akasr donoñ gul rahte haiñ aur jalā kartā huuñ maiñ

hijr o visal charagh hain donon tanhai ke taqon mein

akasr donon gul rahte hain aur jala karta hun main

shab-e-vasl kī kyā kahūñ dāstāñ

zabāñ thak ga.ī guftugū rah ga.ī

shab-e-wasl ki kya kahun dastan

zaban thak gai guftugu rah gai

milne kī ye kaun ghaḌī thī

bāhar hijr kī raat khaḌī thī

milne ki ye kaun ghaDi thi

bahar hijr ki raat khaDi thi

aap to muñh pher kar kahte haiñ aane ke liye

vasl kā va.ada zarā āñkheñ milā kar kījiye

aap to munh pher kar kahte hain aane ke liye

wasl ka wada zara aankhen mila kar kijiye

jab zikr kiyā maiñ ne kabhī vasl kā un se

vo kahne lage paak mohabbat hai baḌī chiiz

jab zikr kiya main ne kabhi wasl ka un se

wo kahne lage pak mohabbat hai baDi chiz

use ḳhabar thī ki ham visāl aur hijr ik saath chāhte haiñ

to us ne aadhā ujaaḌ rakkhā hai aur aadhā banā diyā hai

use KHabar thi ki hum visal aur hijr ek sath chahte hain

to us ne aadha ujaD rakkha hai aur aadha bana diya hai

kabhī mauj-e-ḳhvāb meñ kho gayā kabhī thak ke ret pe so gayā

yūñhī umr saarī guzār dī faqat ārzū-e-visāl meñ

kabhi mauj-e-KHwab mein kho gaya kabhi thak ke ret pe so gaya

yunhi umr sari guzar di faqat aarzu-e-visal mein

shab-e-vasl thī chāndnī kā samāñ thā

baġhal meñ sanam thā ḳhudā mehrbāñ thā

shab-e-wasl thi chandni ka saman tha

baghal mein sanam tha KHuda mehrban tha

āñkheñ batā rahī haiñ ki jaage ho raat ko

in sāġharoñ meñ bū-e-sharāb-e-visāl hai

aankhen bata rahi hain ki jage ho raat ko

in sagharon mein bu-e-sharab-e-visal hai

vasl kī bantī haiñ in bātoñ se tadbīreñ kahīñ

ārzūoñ se phirā kartī haiñ taqdīreñ kahīñ

wasl ki banti hain in baaton se tadbiren kahin

aarzuon se phira karti hain taqdiren kahin

o vasl meñ muñh chhupāne vaale

ye bhī koī vaqt hai hayā kā

o wasl mein munh chhupane wale

ye bhi koi waqt hai haya ka

har ishq ke manzar meñ thā ik hijr kā manzar

ik vasl kā manzar kisī manzar meñ nahīñ thā

har ishq ke manzar mein tha ek hijr ka manzar

ek wasl ka manzar kisi manzar mein nahin tha

us kī qurbat kā nasha kyā chiiz hai

haath phir jalte tave par rakh diyā

us ki qurbat ka nasha kya chiz hai

hath phir jalte tawe par rakh diya

sard jhoñkoñ se bhaḌakte haiñ badan meñ sho.ale

jaan le legī ye barsāt qarīb aa jaao

sard jhonkon se bhaDakte hain badan mein shoale

jaan le legi ye barsat qarib aa jao

hijr ik vaqfa-e-bedār hai do nīñdoñ meñ

vasl ik ḳhvāb hai jis kī koī ta.abīr nahīñ

hijr ek waqfa-e-bedar hai do nindon mein

wasl ek KHwab hai jis ki koi tabir nahin

kahāñ kā vasl tanhā.ī ne shāyad bhes badlā hai

tire dam bhar ke mil jaane ko ham bhī kyā samajhte haiñ

kahan ka wasl tanhai ne shayad bhes badla hai

tere dam bhar ke mil jaane ko hum bhi kya samajhte hain

vo aur va.ada vasl kā qāsid nahīñ nahīñ

sach sach batā ye lafz unhī kī zabāñ ke haiñ

wo aur wada wasl ka qasid nahin nahin

sach sach bata ye lafz unhi ki zaban ke hain