Sher on Hijr

jo baat hijr kī aatī to apne dāman se

vo aañsū poñchhtā jaatā thā aur maiñ rotā thā

jo baat hijr ki aati to apne daman se

wo aansu ponchhta jata tha aur main rota tha

chuuñ sham-e-sozāñ chuuñ zarra hairāñ ze mehr-e-āñ-mah bagashtam āḳhir

na niiñd naināñ na añg chaināñ na aap aave na bheje patiyāñ

chun sham-e-sozan chun zarra hairan ze mehr-e-an-mah bagashtam aaKHir

na nind nainan na ang chainan na aap aawe na bheje patiyan

do alag lafz nahīñ hijr o visāl

ek meñ ek kī goyā.ī hai

do alag lafz nahin hijr o visal

ek mein ek ki goyai hai

ishq par faa.ez huuñ auroñ kī tarah lekin mujhe

vasl kā lapkā nahīñ hai hijr se vahshat nahīñ

ishq par faez hun auron ki tarah lekin mujhe

wasl ka lapka nahin hai hijr se wahshat nahin

ma.alūm thiiñ mujhe tirī majbūriyāñ magar

tere baġhair niiñd na aa.ī tamām raat

malum thin mujhe teri majburiyan magar

tere baghair nind na aai tamam raat

mat dekh ki phirtā huuñ tire hijr meñ zinda

ye pūchh ki jiine meñ maza hai ki nahīñ hai

mat dekh ki phirta hun tere hijr mein zinda

ye puchh ki jine mein maza hai ki nahin hai

'farāz' ishq kī duniyā to ḳhūb-sūrat thī

ye kis ne fitna-e-hijr-o-visāl rakkhā hai

'faraaz' ishq ki duniya to KHub-surat thi

ye kis ne fitna-e-hijr-o-visal rakkha hai

badan meñ jaise lahū tāziyāna ho gayā hai

use gale se lagā.e zamāna ho gayā hai

badan mein jaise lahu taziyana ho gaya hai

use gale se lagae zamana ho gaya hai

tujh hijr kī agan kuuñ būjhāne ai sañg dil

koī āb-zan-rafīq ba-juz chashm-e-tar nahīñ

tujh hijr ki agan kun bujhane ai sang dil

koi aab-zan-rafiq ba-juz chashm-e-tar nahin

dekh le bulbul o parvāna kī betābī ko

hijr achchhā na hasīnoñ kā visāl achchhā hai

dekh le bulbul o parwana ki betabi ko

hijr achchha na hasinon ka visal achchha hai

hijr o visāl charāġh haiñ donoñ tanhā.ī ke tāqoñ meñ

akasr donoñ gul rahte haiñ aur jalā kartā huuñ maiñ

hijr o visal charagh hain donon tanhai ke taqon mein

akasr donon gul rahte hain aur jala karta hun main

tumhāre hijr meñ kyuuñ zindagī na mushkil ho

tumhīñ jigar ho tumhīñ jaan ho tumhīñ dil ho

tumhaare hijr mein kyun zindagi na mushkil ho

tumhin jigar ho tumhin jaan ho tumhin dil ho

shab-e-hijr thī aur maiñ ro rahā thā

koī jāgtā thā koī so rahā thā

shab-e-hijr thi aur main ro raha tha

koi jagta tha koi so raha tha

ishq meñ nisbat nahīñ bulbul ko parvāne ke saath

vasl meñ vo jaan de ye hijr meñ jiitī rahe

ishq mein nisbat nahin bulbul ko parwane ke sath

wasl mein wo jaan de ye hijr mein jiti rahe

tire aane kā dhokā sā rahā hai

diyā sā raat bhar jaltā rahā hai

tere aane ka dhoka sa raha hai

diya sa raat bhar jalta raha hai

dil hijr ke dard se bojhal hai ab aan milo to behtar ho

is baat se ham ko kyā matlab ye kaise ho ye kyūñkar ho

dil hijr ke dard se bojhal hai ab aan milo to behtar ho

is baat se hum ko kya matlab ye kaise ho ye kyunkar ho

us se milne kī ḳhushī ba.ad meñ dukh detī hai

jashn ke ba.ad kā sannāTā bahut khaltā hai

us se milne ki KHushi baad mein dukh deti hai

jashn ke baad ka sannaTa bahut khalta hai

tum se bichhaḌ kar zinda haiñ

jaan bahut sharminda haiñ

tum se bichhaD kar zinda hain

jaan bahut sharminda hain

tūl-e-shab-e-firāq kā qissa na pūchhiye

mahshar talak kahūñ maiñ agar muḳhtasar kahūñ

tul-e-shab-e-firaq ka qissa na puchhiye

mahshar talak kahun main agar muKHtasar kahun

jo ġhazal aaj tire hijr meñ likkhī hai vo kal

kyā ḳhabar ahl-e-mohabbat kā tarāna ban jaa.e

jo ghazal aaj tere hijr mein likkhi hai wo kal

kya KHabar ahl-e-mohabbat ka tarana ban jae

kaḌā hai din baḌī hai raat jab se tum nahīñ aa.e

digar-gūñ haiñ mire hālāt jab se tum nahīñ aa.e

kaDa hai din baDi hai raat jab se tum nahin aae

digar-gun hain mere haalat jab se tum nahin aae

kaav kāv-e-saḳht-jānī hā.e-tanhā.ī na pūchh

sub.h karnā shaam kā laanā hai jū-e-shīr kā

kaw kaw-e-saKHt-jaani hae-tanhai na puchh

subh karna sham ka lana hai ju-e-shir ka

us sañg-dil ke hijr meñ chashmoñ ko apne aah

mānind-e-ābshār kiyā ham ne kyā kiyā

us sang-dil ke hijr mein chashmon ko apne aah

manind-e-abshaar kiya hum ne kya kiya

jis kī āñkhoñ meñ kaTī thiiñ sadiyāñ

us ne sadiyoñ kī judā.ī dī hai

jis ki aankhon mein kaTi thin sadiyan

us ne sadiyon ki judai di hai

tirā vasl hai mujhe be-ḳhudī tirā hijr hai mujhe āgahī

tirā vasl mujh ko firāq hai tirā hijr mujh ko visāl hai

tera wasl hai mujhe be-KHudi tera hijr hai mujhe aagahi

tera wasl mujh ko firaq hai tera hijr mujh ko visal hai

saañs lene meñ dard hotā hai

ab havā zindagī kī raas nahīñ

sans lene mein dard hota hai

ab hawa zindagi ki ras nahin

maiñ lafz lafz meñ tujh ko talāsh kartā huuñ

savāl meñ nahīñ aatā na aa javāb meñ aa

main lafz lafz mein tujh ko talash karta hun

sawal mein nahin aata na aa jawab mein aa

'munīr' achchhā nahīñ lagtā ye terā

kisī ke hijr meñ bīmār honā

'munir' achchha nahin lagta ye tera

kisi ke hijr mein bimar hona

ham kahāñ aur tum kahāñ jānāñ

haiñ ka.ī hijr darmiyāñ jānāñ

hum kahan aur tum kahan jaanan

hain kai hijr darmiyan jaanan

shikva-e-hijr pe sar kaaT ke farmāte haiñ

phir karoge kabhī is muñh se shikāyat merī

shikwa-e-hijr pe sar kaT ke farmate hain

phir karoge kabhi is munh se shikayat meri

tum nahīñ paas koī paas nahīñ

ab mujhe zindagī kī aas nahīñ

tum nahin pas koi pas nahin

ab mujhe zindagi ki aas nahin

rote phirte haiñ saarī saarī raat

ab yahī rozgār hai apnā

rote phirte hain sari sari raat

ab yahi rozgar hai apna

niiñd aatī nahīñ to subah talak

gard-e-mahtāb kā safar dekho

nind aati nahin to subah talak

gard-e-mahtab ka safar dekho

aa.ī hogī kisī ko hijr meñ maut

mujh ko to niiñd bhī nahīñ aatī

aai hogi kisi ko hijr mein maut

mujh ko to nind bhi nahin aati

mirī nazar meñ vahī mohnī sī mūrat hai

ye raat hijr kī hai phir bhī ḳhūb-sūrat hai

meri nazar mein wahi mohni si murat hai

ye raat hijr ki hai phir bhi KHub-surat hai

dekh kar tūl-e-shab-e-hijr duā kartā huuñ

vasl ke roz se bhī umr mirī kam ho jaa.e

dekh kar tul-e-shab-e-hijr dua karta hun

wasl ke roz se bhi umr meri kam ho jae

kyuuñ hijr ke shikve kartā hai kyuuñ dard ke rone rotā hai

ab ishq kiyā to sabr bhī kar is meñ to yahī kuchh hotā hai

kyun hijr ke shikwe karta hai kyun dard ke rone rota hai

ab ishq kiya to sabr bhi kar is mein to yahi kuchh hota hai

vo bhalā kaise batā.e ki ġham-e-hijr hai kyā

jis ko āġhosh-e-mohabbat kabhī hāsil na huā

wo bhala kaise batae ki gham-e-hijr hai kya

jis ko aaghosh-e-mohabbat kabhi hasil na hua

vo aa rahe haiñ vo aate haiñ aa rahe hoñge

shab-e-firāq ye kah kar guzār dī ham ne

wo aa rahe hain wo aate hain aa rahe honge

shab-e-firaq ye kah kar guzar di hum ne

yuuñ guzarte haiñ hijr ke lamhe

jaise vo baat karte jaate haiñ

yun guzarte hain hijr ke lamhe

jaise wo baat karte jate hain

kaisī biptā paal rakhī hai qurbat kī aur duurī kī

ḳhushbū maar rahī hai mujh ko apnī hī kastūrī kī

kaisi bipta pal rakhi hai qurbat ki aur duri ki

KHushbu mar rahi hai mujh ko apni hi kasturi ki

milne kī ye kaun ghaḌī thī

bāhar hijr kī raat khaḌī thī

milne ki ye kaun ghaDi thi

bahar hijr ki raat khaDi thi

kisī ke hijr meñ jiinā muhāl ho gayā hai

kise batā.eñ hamārā jo haal ho gayā hai

kisi ke hijr mein jina muhaal ho gaya hai

kise bataen hamara jo haal ho gaya hai

guzar to jā.egī tere baġhair bhī lekin

bahut udaas bahut be-qarār guzregī

guzar to jaegi tere baghair bhi lekin

bahut udas bahut be-qarar guzregi

bahut dinoñ meñ mohabbat ko ye huā ma.alūm

jo tere hijr meñ guzrī vo raat raat huī

bahut dinon mein mohabbat ko ye hua malum

jo tere hijr mein guzri wo raat raat hui

har ishq ke manzar meñ thā ik hijr kā manzar

ik vasl kā manzar kisī manzar meñ nahīñ thā

har ishq ke manzar mein tha ek hijr ka manzar

ek wasl ka manzar kisi manzar mein nahin tha

tumhārā hijr manā luuñ agar ijāzat ho

maiñ dil kisī se lagā luuñ agar ijāzat ho

tumhaara hijr mana lun agar ijazat ho

main dil kisi se laga lun agar ijazat ho

maiñ tere hijr meñ jiine se ho gayā thā udaas

pe garm-joshī se kyā kyā manāyā ashk mirā

main tere hijr mein jine se ho gaya tha udas

pe garm-joshi se kya kya manaya ashk mera

kahne ko ġham-e-hijr baḌā dushman-e-jāñ hai

par dost bhī is dost se behtar nahīñ miltā

kahne ko gham-e-hijr baDa dushman-e-jaan hai

par dost bhi is dost se behtar nahin milta

tāroñ kā go shumār meñ aanā muhāl hai

lekin kisī ko niiñd na aa.e to kyā kare

taron ka go shumar mein aana muhaal hai

lekin kisi ko nind na aae to kya kare