bhāñp hī leñge ishāra sar-e-mahfil jo kiyā

tāḌne vaale qayāmat kī nazar rakhte haiñ

bhanp hi lenge ishaara sar-e-mahfil jo kiya

taDne wale qayamat ki nazar rakhte hain

ġhairoñ se to fursat tumheñ din raat nahīñ hai

haañ mere liye vaqt-e-mulāqāt nahīñ hai

ghairon se to fursat tumhein din raat nahin hai

han mere liye waqt-e-mulaqat nahin hai

tujh sā koī jahān meñ nāzuk-badan kahāñ

ye pañkhuḌī se hoñT ye gul sā badan kahāñ

tujh sa koi jahan mein nazuk-badan kahan

ye pankhuDi se honT ye gul sa badan kahan

laḌne ko dil jo chāhe to āñkheñ laḌā.iye

ho jañg bhī agar to mazedār jañg ho

laDne ko dil jo chahe to aankhen laDaiye

ho jang bhi agar to mazedar jang ho

ai dost tujh ko rahm na aa.e to kyā karūñ

dushman bhī mere haal pe ab āb-dīda hai

ai dost tujh ko rahm na aae to kya karun

dushman bhi mere haal pe ab aab-dida hai

nāla-e-bulbul-e-shaidā to sunā hañs hañs kar

ab jigar thaam ke baiTho mirī baarī aa.ī

nala-e-bulbul-e-shaida to suna hans hans kar

ab jigar tham ke baiTho meri bari aai

samjhā liyā fareb se mujh ko to aap ne

dil se to pūchh lījiye kyuuñ be-qarār hai

samjha liya fareb se mujh ko to aap ne

dil se to puchh lijiye kyun be-qarar hai

vahī shāgird phir ho jaate haiñ ustād ai 'jauhar'

jo apne jān-o-dil se ḳhidmat-e-ustād karte haiñ

wahi shagird phir ho jate hain ustad ai 'jauhar'

jo apne jaan-o-dil se KHidmat-e-ustad karte hain

jo dost haiñ vo māñgte haiñ sulh kī duā

dushman ye chāhte haiñ ki aapas meñ jañg ho

jo dost hain wo mangte hain sulh ki dua

dushman ye chahte hain ki aapas mein jang ho

ḳhūb-rū haiñ saikḌoñ lekin nahīñ terā javāb

dilrubā.ī meñ adā meñ naaz meñ andāz meñ

KHub-ru hain saikDon lekin nahin tera jawab

dilrubai mein ada mein naz mein andaz mein

ham ishq meñ haiñ fard to tum husn meñ yaktā

ham sā bhī nahīñ ek jo tum sā nahīñ koī

hum ishq mein hain fard to tum husn mein yakta

hum sa bhi nahin ek jo tum sa nahin koi

na vo sūrat dikhāte haiñ na milte haiñ gale aa kar

na āñkheñ shaad hotīñ haiñ na dil masrūr hotā hai

na wo surat dikhate hain na milte hain gale aa kar

na aankhen shad hotin hain na dil masrur hota hai

dost do-chār nikalte haiñ kahīñ lākhoñ meñ

jitne hote haiñ sivā utne hī kam hote haiñ

dost do-chaar nikalte hain kahin lakhon mein

jitne hote hain siwa utne hi kam hote hain

zarra samajh ke yuuñ na milā mujh ko ḳhaak meñ

ai āsmān maiñ bhī kabhī āftāb thā

zarra samajh ke yun na mila mujh ko KHak mein

ai aasman main bhi kabhi aaftab tha

duniyā bahut ḳharāb hai jā-e-guzar nahīñ

bistar uThāo rahne ke qābil ye ghar nahīñ

duniya bahut KHarab hai ja-e-guzar nahin

bistar uThao rahne ke qabil ye ghar nahin

armān vasl kā mirī nazroñ se taaḌ ke

pahle hī se vo baiTh ga.e muñh bigāḌ ke

arman wasl ka meri nazron se taD ke

pahle hi se wo baiTh gae munh bigaD ke

tasavvur zulf kā hai aur maiñ huuñ

balā kā sāmnā hai aur maiñ huuñ

tasawwur zulf ka hai aur main hun

bala ka samna hai aur main hun

mohabbat ko chhupā.e laakh koī chhup nahīñ saktī

ye vo afsāna hai jo be-kahe mash.hūr hotā hai

mohabbat ko chhupae lakh koi chhup nahin sakti

ye wo afsana hai jo be-kahe mashhur hota hai

dost dil rakhne ko karte haiñ bahāne kyā kyā

roz jhūTī ḳhabar-e-vasl sunā jaate haiñ

dost dil rakhne ko karte hain bahane kya kya

roz jhuTi KHabar-e-wasl suna jate hain

thame aañsū to phir tum shauq se ghar ko chale jaanā

kahāñ jaate ho is tūfān meñ paanī zarā Thahre

thame aansu to phir tum shauq se ghar ko chale jaana

kahan jate ho is tufan mein pani zara Thahre

va.ada nahīñ payām nahīñ guftugū nahīñ

hairat hai ai ḳhudā mujhe kyuuñ intizār hai

wada nahin payam nahin guftugu nahin

hairat hai ai KHuda mujhe kyun intizar hai

ai dil-e-zār maza dekh liyā ulfat kā

ham na kahte the ki is kaam meñ zillat hogī

ai dil-e-zar maza dekh liya ulfat ka

hum na kahte the ki is kaam mein zillat hogi

do hī din meñ ye sanam hosh-rubā hote haiñ

kal ke tarshe hue but aaj ḳhudā hote haiñ

do hi din mein ye sanam hosh-ruba hote hain

kal ke tarshe hue but aaj KHuda hote hain

nūr-e-badan se phailī añdhere meñ chāñdnī

kapḌe jo us ne shab ko utāre palañg par

nur-e-badan se phaili andhere mein chandni

kapDe jo us ne shab ko utare palang par

dil pyaar kī nazar ke liye be-qarār hai

ik tiir is taraf bhī ye taaza shikār hai

dil pyar ki nazar ke liye be-qarar hai

ek tir is taraf bhi ye taza shikar hai

chup raho kyuuñ mizāj pūchhte ho

ham ji.eñ yā mareñ tumheñ kyā hai

chup raho kyun mizaj puchhte ho

hum jien ya maren tumhein kya hai

muñh par naqāb-e-zard har ik zulf par gulāl

holī kī shaam hī to sahar hai basant kī

munh par naqab-e-zard har ek zulf par gulal

holi ki sham hi to sahar hai basant ki

ahl-e-jannat mujhe lete haiñ na dozaḳh vaale

kis jagah jā ke tumhārā ye gunahgār rahe

ahl-e-jannat mujhe lete hain na dozaKH wale

kis jagah ja ke tumhaara ye gunahgar rahe

hāl-e-dil sunte nahīñ ye kah ke ḳhush kar dete haiñ

phir kabhī fursat meñ sun leñge kahānī aap kī

haal-e-dil sunte nahin ye kah ke KHush kar dete hain

phir kabhi fursat mein sun lenge kahani aap ki

na māñgiye jo ḳhudā se to māñgiye kis se

jo de rahā hai usī se savāl hotā hai

na mangiye jo KHuda se to mangiye kis se

jo de raha hai usi se sawal hota hai

merī hī jaan ke dushman haiñ nasīhat vaale

mujh ko samjhāte haiñ un ko nahīñ samjhāte haiñ

meri hi jaan ke dushman hain nasihat wale

mujh ko samjhate hain un ko nahin samjhate hain

baal apne us parī-rū ne sañvāre raat bhar

saañp loTe saikḌoñ dil par hamāre raat bhar

baal apne us pari-ru ne sanware raat bhar

sanp loTe saikDon dil par hamare raat bhar

chhoḌnā hai to na ilzām lagā kar chhoḌo

kahīñ mil jaao to phir lutf-e-mulāqāt rahe

chhoDna hai to na ilzam laga kar chhoDo

kahin mil jao to phir lutf-e-mulaqat rahe

hāl-e-dil yaar ko mahfil meñ sunā.eñ kyūñ-kar

mudda.ī kaan idhar aur udhar rakhte haiñ

haal-e-dil yar ko mahfil mein sunaen kyun-kar

muddai kan idhar aur udhar rakhte hain

aap to muñh pher kar kahte haiñ aane ke liye

vasl kā va.ada zarā āñkheñ milā kar kījiye

aap to munh pher kar kahte hain aane ke liye

wasl ka wada zara aankhen mila kar kijiye

aa gayā 'jauhar' ajab ulTā zamāna kyā kaheñ

dost vo karte haiñ bāteñ jo adū karte nahīñ

aa gaya 'jauhar' ajab ulTa zamana kya kahen

dost wo karte hain baaten jo adu karte nahin

dekhiye kyā dikhātī hai taqdīr

chup khaḌā huuñ gunāhgāroñ meñ

dekhiye kya dikhati hai taqdir

chup khaDa hun gunahgaron mein

suntā huuñ maiñ ki aaj vo tashrīf lā.eñge

allāh sach kare kahīñ jhūTī ḳhabar na ho

sunta hun main ki aaj wo tashrif laenge

allah sach kare kahin jhuTi KHabar na ho

ka.abe meñ bhī vahī hai shivāle meñ bhī vahī

donoñ makān us ke haiñ chāhe jidhar rahe

kabe mein bhi wahi hai shiwale mein bhi wahi

donon makan us ke hain chahe jidhar rahe

āḳhir ik roz to paivand-e-zamīñ honā hai

jāma-e-zīst nayā aur purānā kaisā

aaKHir ek roz to paiwand-e-zamin hona hai

jama-e-zist naya aur purana kaisa

vāqif nahīñ ki paañv meñ paḌtī haiñ beḌiyāñ

dūlhe ko ye ḳhushī hai ki merī barāt hai

waqif nahin ki panw mein paDti hain beDiyan

dulhe ko ye KHushi hai ki meri baraat hai

apnī zabān se mujhe jo chāhe kah leñ aap

baḌh baḌh ke bolnā nahīñ achchhā raqīb kā

apni zaban se mujhe jo chahe kah len aap

baDh baDh ke bolna nahin achchha raqib ka

puurī hotī haiñ tasavvur meñ umīdeñ kyā kyā

dil meñ sab kuchh hai magar pesh-e-nazar kuchh bhī nahīñ

puri hoti hain tasawwur mein umiden kya kya

dil mein sab kuchh hai magar pesh-e-nazar kuchh bhi nahin

is qamar ko kabhī to dekheñge

tiis din hote haiñ mahīne ke

is qamar ko kabhi to dekhenge

tis din hote hain mahine ke

ab itr bhī malo to takalluf kī bū kahāñ

vo din havā hue jo pasīna gulāb thā

ab itr bhi malo to takalluf ki bu kahan

wo din hawa hue jo pasina gulab tha

barsāt kā mazā tire gesū dikhā ga.e

aks āsmān par jo paḌā abr chhā ga.e

barsat ka maza tere gesu dikha gae

aks aasman par jo paDa abr chha gae

jo kuchh paḌtī hai sar par sab uThātā hai mohabbat meñ

jahāñ dil aa gayā phir aadmī majbūr hotā hai

jo kuchh paDti hai sar par sab uThata hai mohabbat mein

jahan dil aa gaya phir aadmi majbur hota hai

kaun hote haiñ vo mahfil se uThāne vaale

yuuñ to jaate bhī magar ab nahīñ jaane vaale

kaun hote hain wo mahfil se uThane wale

yun to jate bhi magar ab nahin jaane wale

siine se lipTo yā galā kaaTo

ham tumhāre haiñ dil tumhārā hai

sine se lipTo ya gala kaTo

hum tumhaare hain dil tumhaara hai

ḳhvāb meñ naam tirā le ke pukār uThtā huuñ

be-ḳhudī meñ bhī mujhe yaad tirī yaad kī hai

KHwab mein nam tera le ke pukar uThta hun

be-KHudi mein bhi mujhe yaad teri yaad ki hai