TOP 20 WELCOME SHAYARI

vo aa.e ghar meñ hamāre ḳhudā kī qudrat hai

kabhī ham un ko kabhī apne ghar ko dekhte haiñ

wo aae ghar mein hamare KHuda ki qudrat hai

kabhi hum un ko kabhi apne ghar ko dekhte hain

guloñ meñ rañg bhare bād-e-nau-bahār chale

chale bhī aao ki gulshan kā kārobār chale

gulon mein rang bhare baad-e-nau-bahaar chale

chale bhi aao ki gulshan ka karobar chale

tum aa ga.e ho to kuchh chāñdnī sī bāteñ hoñ

zamīñ pe chāñd kahāñ roz roz utartā hai

tum aa gae ho to kuchh chandni si baaten hon

zamin pe chand kahan roz roz utarta hai

sau chāñd bhī chamkeñge to kyā baat banegī

tum aa.e to is raat kī auqāt banegī

sau chand bhi chamkenge to kya baat banegi

tum aae to is raat ki auqat banegi

us ne va.ada kiyā hai aane kā

rañg dekho ġharīb ḳhāne kā

us ne wada kiya hai aane ka

rang dekho gharib KHane ka

der lagī aane meñ tum ko shukr hai phir bhī aa.e to

aas ne dil kā saath na chhoḌā vaise ham ghabrā.e to

der lagi aane mein tum ko shukr hai phir bhi aae to

aas ne dil ka sath na chhoDa waise hum ghabrae to

aap aa.e haiñ so ab ghar meñ ujālā hai bahut

kahiye jaltī rahe yā sham.a bujhā dī jaa.e

aap aae hain so ab ghar mein ujala hai bahut

kahiye jalti rahe ya shama bujha di jae

har galī achchhī lagī har ek ghar achchhā lagā

vo jo aayā shahr meñ to shahr bhar achchhā lagā

har gali achchhi lagi har ek ghar achchha laga

wo jo aaya shahr mein to shahr bhar achchha laga

jis bazm meñ sāġhar ho na sahbā ho na ḳhum ho

rindoñ ko tasallī hai ki us bazm meñ tum ho

jis bazm mein saghar ho na sahba ho na KHum ho

rindon ko tasalli hai ki us bazm mein tum ho

shukriya terā tire aane se raunaq to baḌhī

varna ye mahfil-e-jazbāt adhūrī rahtī

shukriya tera tere aane se raunaq to baDhi

warna ye mahfil-e-jazbaat adhuri rahti

ye kis zohra-jabīñ kī anjuman meñ aamad aamad hai

bichhāyā hai qamar ne chāñdnī kā farsh mahfil meñ

ye kis zohra-jabin ki anjuman mein aamad aamad hai

bichhaya hai qamar ne chandni ka farsh mahfil mein

har tarah kī be-sar-o-sāmāniyoñ ke bāvajūd

aaj vo aayā to mujh ko apnā ghar achchhā lagā

har tarah ki be-sar-o-samaniyon ke bawajud

aaj wo aaya to mujh ko apna ghar achchha laga

ḳhush-āmdīd vo aayā hamārī chaukhaT par

bahār jis ke qadam kā tavāf kartī hai

KHush-amdid wo aaya hamari chaukhaT par

bahaar jis ke qadam ka tawaf karti hai

itne din ke baad tū aayā hai aaj

sochtā huuñ kis tarah tujh se milūñ

itne din ke baad tu aaya hai aaj

sochta hun kis tarah tujh se milun

bujhte hue charāġh farozāñ kareñge ham

tum aaoge to jashn-e-charāġhāñ kareñge ham

bujhte hue charagh farozan karenge hum

tum aaoge to jashn-e-charaghan karenge hum

ye intizār kī ghaḌiyāñ ye shab kā sannāTā

is ek shab meñ bhare haiñ hazār saal ke din

ye intizar ki ghaDiyan ye shab ka sannaTa

is ek shab mein bhare hain hazar sal ke din

raunaq-e-bazm nahīñ thā koī tujh se pahle

raunaq-e-bazm tire ba.ad nahīñ hai koī

raunaq-e-bazm nahin tha koi tujh se pahle

raunaq-e-bazm tere baad nahin hai koi

suntā huuñ maiñ ki aaj vo tashrīf lā.eñge

allāh sach kare kahīñ jhūTī ḳhabar na ho

sunta hun main ki aaj wo tashrif laenge

allah sach kare kahin jhuTi KHabar na ho

tum jo aa.e ho to shakl-e-dar-o-dīvār hai aur

kitnī rañgīn mirī shaam huī jaatī hai

tum jo aae ho to shakl-e-dar-o-diwar hai aur

kitni rangin meri sham hui jati hai